काठमाडौं । संयुक्त अरब इमिरेट्स (यूएई) ले भिजिट भिसा (भ्रमण भिसा) सम्बन्धी नयाँ नियम लागू गरेको छ, जसले अब आफन्त वा साथीलाई यूएई बोलाउन चाहने व्यक्तिको तलबमा आधारित मापदण्ड तोकेको छ।
संघीय पहिचान, नागरिकता, भन्सार तथा बन्दरगाह सुरक्षा प्राधिकरण (आईसीपी) का अनुसार अब परिवार वा साथीलाई स्पोन्सर गर्नका लागि स्पोन्सरको न्यूनतम आम्दानी अनिवार्य गरिएको हो।
नयाँ मापदण्ड अनुसार—
पहिलो तह (बुबा–आमा, श्रीमान–श्रीमती, छोरा–छोरी) ल्याउन मासिक कम्तीमा ४,००० दिराम तलब आवश्यक हुनेछ।
दोस्रो तह (दाजुभाइ, दिदीबहिनी, हजुरबा–हजुरआमा, नाति–नातिनी) का लागि ८,००० दिराम तलब चाहिनेछ।
तेस्रो तह (काका–काकी, मामा, फुपु, कजिन) स्पोन्सर गर्न पनि ८,००० दिराम तलब आवश्यक हुनेछ।
साथी वा नन–रिलेटिभ (Non-relative) लाई स्पोन्सर गर्न चाहनेले भने १५,००० दिराम मासिक तलब हुनुपर्नेछ।
आईसीपीले जनाएको छ कि नयाँ व्यवस्था पारदर्शिता बढाउने, आर्थिक विविधिकरणलाई सघाउने र दक्ष जनशक्ति तथा प्रतिभाशाली व्यक्तिलाई यूएई आकर्षित गर्ने उद्देश्यले ल्याइएको हो।
भिजिट भिसाका लागि आवेदन दिनेलाई ६ महिनासम्म वैध राहदानी र फिर्ता यात्रा टिकट अनिवार्य गरिएको छ। साथै, आफन्तको हकमा नाता सम्बन्ध प्रमाण पनि पेश गर्नुपर्नेछ।
चार नयाँ भ्रमण भिसा वर्ग
यूएईले भिजिट भिसाका चार नयाँ वर्ग पनि तोकेको छ —
१. कृत्रिम बुद्धिमत्ता (AI)
२. मनोरञ्जन
३. कार्यक्रम र क्रुज जहाज
४. पर्यटन र मनोरञ्जनसम्बन्धी भिसा
त्यसका साथै, मानवीय कारणका आधारमा एक वर्षे बसोबास अनुमति दिने व्यवस्था गरिएको छ, जुन विशेष सर्तअनुसार थप्न सकिनेछ। यो नियम विशेष गरी विदेशी विधवा वा सम्बन्धविच्छेद भएकी एकल महिलाहरूका लागि लागू हुनेछ, जसले प्रायोजकविना नै यूएईमा बसोबास अनुमति पाउनेछन्।
आईसीपीका महानिर्देशक मेजर जनरल सुहेल सईद अल खैलीका अनुसार, नयाँ नियमहरू जीवनस्तर सुधार, व्यापार र यातायात विस्तार, प्रविधि क्षेत्र सुदृढीकरण र यूएईको अन्तर्राष्ट्रिय प्रतिस्पर्धात्मकता वृद्धि गर्न लक्षित छन्।
प्रकाशित मिति: सोमबार, असोज २०, २०८२
