काठमाडौं । नेपाली कांग्रेसका प्रवक्ता प्रकाशशरण महतले सभापति शेरबहादुर देउवाले देश छाड्नुपर्ने कुनै कारण नभएको बताएका छन्।
आइतबार पत्रकार भेटघाटमा बोल्दै उनले देउवाले देश छाडेर भाग्ने तयारी गरिरहेको भन्ने प्रचार पूर्णतया भ्रमपूर्ण भएको बताए। लोकतान्त्रिक आन्दोलनका कठिन क्षणमा समेत डटेर उभिएका देउवाले आत्तिएर देश छाड्ने कुरा कल्पनै गर्न नसकिने महतको भनाइ छ।
‘सांघातिक रुपमा हमला हुने जानकारी हुँदाहुँदै पनि उहाँले घर छोड्नुभएन भने देश छाड्नुपर्ने कुनै आधार छैन,’ महतले स्पष्ट पारे।
उनले पासपोर्ट लिनु हरेक नागरिकको अधिकार भएको भन्दै यसलाई अपराधझैं प्रस्तुत गर्ने प्रयास असफल हुने टिप्पणी गरे।
महतले कांग्रेस कार्यकर्तामाझ देखिएको अन्योल अन्त्य गर्न सबै विषय केन्द्रीय समितिमार्फत समाधान हुने बताए। नेतृत्व परिवर्तनका लागि हस्ताक्षर संकलनजस्ता गतिविधिले पार्टीमा भ्रम फैलाएको भन्दै उनले त्यसको निचोड पनि समितिबाटै आउने स्पष्ट पारे।
‘अफ्ठ्यारो परिस्थितिमा एकजुट भएर सामूहिक निष्कर्ष निकाल्ने हाम्रो बाटो हो। अधिवेशन प्रक्रिया चाँडै अघि बढाउनेबारे पनि दुईमत छैन,’ प्रवक्ता महतले भने।
प्रकाशित मिति: आइतबार, असोज १२, २०८२
