काठमाडौं । नेकपा एमालेका अध्यक्ष तथा पूर्वप्रधानमन्त्री केपी शर्मा ओलीले सरकारले सुविधा फिर्ता लिन सक्ने भए पनि सुरक्षा भने दिनैपर्ने बताएका छन् ।
भक्तपुरमा आयोजित चियापान कार्यक्रममा बोल्दै ओलीले आफ्नो घरलाई सामाजिक सञ्जालमार्फत लक्ष्य बनाइएको भन्दै सरकार किन मौन रहेको प्रश्न उठाए ।
“अहिले तपाईंहरूले सामाजिक सञ्जालमा देख्नुभएको होला, केपी ओलीको घर लोकेट गरेर घर घेर्न जाऔं भन्ने प्रचार गरिएको छ । सरकार के हेरेर बसिरहेको छ ?” ओलीको प्रश्न थियो ।
उनले सरकारले सुविधा, गाडी, पासपोर्ट रोक्ने वा मुद्दा चलाउने अधिकार राखे पनि नागरिकलाई सुरक्षा दिने जिम्मेवारी नटार्न सक्ने बताए ।
“असुरक्षाको माध्यमबाट सरकारमा पुग्ने, आतंक फिजाएर सरकारमा पुग्ने अनि अरुलाई सुरक्षा दिन्नँ भन्न मिल्छ ? सरकारमा हुनेहरूले सुविधा चाहिँदैन भने पनि सुरक्षा दिनुपर्ने हुन्छ,” ओलीले चेतावनी दिए ।
त्यस्तै उनले मौसम सधैं एकनास नहुने जस्तै राजनीतिक परिस्थिति पनि परिवर्तनशील हुने उल्लेख गर्दै, “झरी बादलपछि फेरि मुसुक्क हाँस्ने समय आउँछ,” भन्ने भाव प्रकट गरे ।
प्रकाशित मिति: शनिबार, असोज ११, २०८२
