काठमाडौं । वरिष्ठ अधिवक्ता टीकाराम भट्टराईले भ्रष्टाचारमा संलग्न नेतामाथि कानुनी कारबाही गर्नुपर्नेमा जोड दिँदै त्यसलाई राजनीतिक प्रतिशोधको साधन बनाउन नहुने बताएका छन्।
शुक्रबार काठमाडौंमा पूर्वराष्ट्रपति विद्यादेवी भण्डारीको उपस्थितिमा आयोजित कार्यक्रममा बोल्दै उनले आगामी निर्वाचन संविधान संशोधनका ठोस एजेन्डासहित हुनुपर्नेमा जोड दिए।
भट्टराईले दुई पटकभन्दा बढी प्रधानमन्त्री भइसकेका व्यक्तिलाई पुनः प्रधानमन्त्री बन्ने बाटो संविधानमै बन्द गर्नुपर्ने प्रस्ताव अघि सारे। साथै, सरकारलाई कार्यकारी आदेशका नाममा संविधान मिच्ने काम नगर्न चेतावनी दिए।
उनले प्रेस स्वतन्त्रता जोगाउन, संवैधानिक निकायलाई दलहरूको प्रभावमुक्त बनाउन र निर्वाचनलाई मुलुकको स्थायी निकासका रूपमा अघि बढाउनुपर्ने सुझाव पनि प्रस्तुत गरे।
जेन–जी आन्दोलनपछि नागरिक समाजले राष्ट्रपतिलाई बुझाएको ज्ञापनपत्रलाई स्मरण गर्दै उनले संविधानको रक्षा गर्न सबै पक्ष एकजुट हुनुपर्ने बताए।
संविधानका केही धारा (७४, ७५, ७६, ७७ र १३२) मा समस्या देखिएको उल्लेख गर्दै उनले भदौ २३–२४ को जनआन्दोलनपछि संविधानमै ग्रहण लागेको टिप्पणी गरे।
प्रकाशित मिति: शुक्रबार, असोज १०, २०८२
