काठमाडौं । प्रधानमन्त्री सुशीला कार्कीले आगामी फागुन २१ गते प्रतिनिधिसभा निर्वाचन स्वच्छ, निष्पक्ष, स्वतन्त्र र भयरहित वातावरणमा सम्पन्न गराउने सरकारको दृढ प्रतिबद्धता व्यक्त गरेकी छन्।
बिहीबार सिंहदरबारबाट राष्ट्रका नाममा पहिलो सम्बोधन गर्दै उनले विदेशमा रहेका नेपाली मतदातालाई समेत मतदानको अवसर दिलाउन उपाय खोजिरहेको जानकारी दिइन्।
सम्बोधनमा कार्कीले जेनजी आन्दोलनले उठाएका भ्रष्टाचार नियन्त्रण र सुशासन सुनिश्चितताका मागप्रति सरकार जिम्मेवार भएर लाग्ने प्रतिवद्धता दोहोराइन्। तर आन्दोलनका क्रममा भएको आगजनी र तोडफोडप्रति उनले भत्र्सना गर्दै दोषीमाथि कडा कारबाही गर्ने चेतावनी दिइन्।
प्रधानमन्त्रीले संविधान संशोधन निर्वाचनमार्फत मात्र सम्भव हुने भन्दै असन्तुष्ट पक्षलाई लोकतान्त्रिक तरिकाले चुनावमा सहभागी हुन आग्रह गरिन्। उनले योग्य नेतृत्व चयन गर्न नागरिकलाई विशेषतः युवापुस्तालाई सक्रिय सहभागिताको आह्वानसमेत गरिन्।
उनका अनुसार सेवाग्राहीसँग ढिलासुस्ती, मोलमोलाइ, घुस माग्ने वा अपमानजनक व्यवहार गर्ने कर्मचारीविरुद्ध सजिलै उजुरी दिन सकिने व्यवस्था मिलाइएको छ।
भदौ २३ र २४ गतेको जेनजी आन्दोलनपछि आन्तरिक सरकार गठन भएसँगै पूर्वप्रधानन्यायाधीश कार्कीको नेतृत्वमा निर्वाचन तयारी भइरहेको छ। यसै सन्दर्भमा प्रधानमन्त्रीको सिंहदरबारबाट राष्ट्रका नाममा पहिलो सम्बोधन भएको हो।
प्रकाशित मिति: बिहीबार, असोज ९, २०८२
