काठमाडौं । नेकपा एमालेका सचिव योगेश भट्टराईले पार्टी पुनःगठनको अपिल गरेका छन्। उनले जेन-जी विद्रोहपश्चात् उत्पन्न राजनीतिक परिस्थिति गम्भीरतापूर्वक मूल्याङ्कन गर्नुपर्ने आवश्यकता औंल्याउँदै पुनर्गठन अभियानमा सबै कार्यकर्तालाई जोडिन आग्रह गरेका हुन्। भिडियो सन्देशमार्फत उनले भने, “इतिहासका हरेक संकट र मोडमा हामी पुनर्गठित भएका छौं, आज पनि त्यही बाटो अपनाउन जरुरी छ। आत्मभर्त्सना बन्द गरौं, आत्मसमीक्षा डटेर गरौं।”
भट्टराईले १९ माघ २०६१ मा तत्कालीन राजा ज्ञानेन्द्रले संविधान र लोकतान्त्रिक प्रणालीमाथि गरेको ‘कू’ को प्रसंग स्मरण गरे। त्यतिबेला समाजभर सन्नाटा छाए पनि एमालेभित्रको युवा पुस्ताले पुनर्गठनको बहस प्रारम्भ गरेको र अन्ततः नवौं महाधिवेशनमार्फत पार्टीले नयाँ ढाँचा पाएको उनले उल्लेख गरे। उनका अनुसार, सो प्रक्रियाले पार्टीलाई जोगाएको मात्र होइन आन्दोलनलाई सफलतापूर्वक अघि बढाउन मद्दत पनि गर्यो।
उनले पार्टीका कमजोरी स्वीकार नगरेसम्म सुधार र प्रगति सम्भव नहुने चेतावनी दिए। लेनिनलाई उद्धृत गर्दै उनले भने, “क्रान्तिकारी आन्दोलनले आफ्ना कमजोरीलाई स्वीकार नगरेसम्म प्रगति सम्भव हुँदैन। कमजोरी लुकाउनु भनेको दुश्मनलाई बलियो बनाउन सहयोग गर्नु हो।”
जेन-जी आन्दोलनले ल्याएको राजनीतिक हलचलले पुरानो ढाँचा चुनौतीमा परेको भन्दै उनले फेरि एकपटक एमालेले पुनर्गठनमार्फत जनतासँग नजिक हुनुपर्नेमा जोड दिए। उनका अनुसार, संकटलाई अवसरमा रूपान्तरण गर्न सक्ने शक्ति एमालेसँग अझै पनि छ, तर त्यसका लागि आत्मसमीक्षा र सुधारको बाटो अपनाउन आवश्यक छ।
भट्टराईले आफ्नो अपिलमार्फत एमाले नेतृत्वलाई समेत चेतावनीका साथ आग्रह गरेका छन्। उनले भने, “पार्टी पुनर्गठन भनेको नेतृत्वलाई कमजोर बनाउनु होइन, बरु सम्मानसहित नयाँ दृष्टिकोण र ऊर्जा दिनु हो। इतिहासले प्रमाणित गरिसकेको छ—पार्टी पुनर्गठन भनेको पार्टीलाई जीवित राख्ने माध्यम हो। आज फेरि त्यही इतिहास दोहोर्याउने बेला आएको छ।”
प्रकाशित मिति: बिहीबार, असोज ९, २०८२
