काठमाडौं । नेकपा माओवादी केन्द्रले पार्टीको केन्द्रीय कमिटी विघटन गर्ने र अध्यक्ष प्रचण्डको संयोजकत्वमा विशेष महाधिवेशन आयोजक समिति गठन गर्ने तयारी गरेको छ।
बुधबार पेरिसडाँडामा बसेको स्थायी कमिटी बैठकले पार्टीभित्र एकता कायम गर्ने उद्देश्यसहित केन्द्रीय कमिटी भंग गर्ने प्रस्ताव केन्द्रीय कमिटीमा लैजाने निर्णय गरेको प्रवक्ता अग्निप्रसाद सापकोटाले जानकारी दिए।
उनका अनुसार, विशेष महाधिवेशन आयोजक समितिको संयोजकमा प्रचण्ड रहने पक्का भएको छ। तर, यसबारे फरक मत भए केन्द्रीय कमिटीमै छलफल हुने सापकोटाले स्पष्ट पारे।
बैठकले विशेष महाधिवेशनको मिति तोक्ने, केन्द्रीय कमिटीमा राजनीतिक प्रस्ताव प्रस्तुत गर्ने, प्रदेशअनुसार प्रतिनिधि विभाजन गर्ने र पूर्ण बैठकमा प्रतिवेदन पेश गर्ने निर्णय गरेको छ।
त्यसैगरी तोकिएको समयमा निर्वाचन सम्पन्न गर्न सरकारको ध्यानाकर्षण गराउने र पार्टीको तर्फबाट सक्दो सक्रिय भूमिका खेल्ने निष्कर्ष पनि बैठकले निकालेको छ।
यस्तै, जेनजीलगायत परिवर्तनकारी शक्तिहरूसँग संवाद र समझदारी कायम गर्ने, समाजवादी मोर्चा तथा विचार मिल्ने शक्तिसँग कार्यगत एकताको पहल गर्ने रणनीति माओवादी स्थायी कमिटीको निर्णयमा समावेश गरिएको छ।
प्रकाशित मिति: बुधबार, असोज ८, २०८२
