काठमाडौँ । आगामी फागुन २१ गतेका लागि तोकिएको प्रतिनिधिसभा निर्वाचनलाई निष्पक्ष, स्वच्छ र मितव्ययी बनाउन निर्वाचन आयोगका पदाधिकारीले प्रधानमन्त्री सुशीला कार्कीसँग सिंहदरबारमा विशेष छलफल गरेका छन् ।
प्रधानमन्त्री तथा मन्त्रिपरिषद्को कार्यालयमा भएको भेटवार्तामा कार्यवाहक प्रमुख निर्वाचन आयुक्त रामप्रसाद भण्डारीसहितका पदाधिकारीले आवश्यक कानुनी संशोधन, व्यवस्थापन र स्रोत–साधन परिचालनका विषयमा प्रधानमन्त्रीसँग परामर्श गरेका हुन् ।
सो अवसरमा कानुन, न्याय तथा संसदीय मामिला मन्त्री अनिलकुमार सिन्हाले निर्वाचन तयारी अब अनिवार्य रूपमा अघि बढाउनुपर्ने भन्दै सम्भावित अवरोध पहिचान गरी तत्काल समाधान गर्नुपर्नेमा जोड दिनुभयो ।
आयोगका प्रवक्ता नारायण प्रसाद भट्टराईले प्रारम्भिक समन्वयका लागि छलफल भएको बताउँदै निर्वाचनको सफलताका लागि निरन्तर सरकारसँग सहकार्य हुने जानकारी दिनुभयो । उहाँका अनुसार आयोग स्वच्छ, स्वतन्त्र र निष्पक्ष ढङ्गले निर्वाचन सम्पन्न गराउने प्रतिबद्धतामा दृढ रहेको छ ।
हालसम्म १८ वर्ष उमेर पूरा गरेका मतदाताको संख्या एक करोड ८१ लाख ६८ हजार २३० पुगेको आयोगले जनाएको छ । आयोगले मतदाता नामावली ऐन २०७३ संशोधन लगायत कानुनी व्यवस्था मिलाउन सरकारसँग आग्रह गर्दै आएको छ ।
यसअघि असोज २ गते आयोगले गृहमन्त्री ओमप्रकाश अर्यालसँग पनि छलफल गरेको थियो । मध्यावधि निर्वाचनको मिति घोषणा भइसकेपछि स्थगित भएको मतदाता नामावली सङ्कलन पुनः सुरु गर्न अध्यादेशमार्फत कानुन संशोधन आवश्यक हुने आयोगले जनाएको छ । विदेशमा रहेका नेपालीलाई मताधिकार दिनेबारे सर्वोच्च अदालतको आदेश आएपछि त्यसबारे पनि आयोग कानुनी विज्ञसँग परामर्श गरिरहेको छ ।
गत भदौ २३ र २४ गतेको जेनजी प्रदर्शनपछिको राजनीतिक परिस्थितिलाई सम्बोधन गर्दै पूर्वप्रधानन्यायाधीश कार्कीको नेतृत्वमा बनेको अन्तरिम सरकारले फागुन २१ गतेका लागि प्रतिनिधिसभा निर्वाचन घोषणा गरिसकेको हो ।
प्रकाशित मिति: मंगलबार, असोज ७, २०८२
