काठमाडौं । प्रधानमन्त्री सुशीला कार्की र प्रधानसेनापति अशोकराज सिग्देलबीच सिंहदरबारमा पहिलो पटक भेटवार्ता भएको छ। मंगलबार प्रधानमन्त्री तथा मन्त्रिपरिषद्को कार्यालयमा बसेको उक्त भेटमा मुलुकको पछिल्लो शान्ति–सुरक्षाको अवस्थासहित हालसालै भएको राजनीतिक परिवर्तनका विभिन्न पक्षमा छलफल भएको स्रोतले जनाएको छ।
प्रधानमन्त्री कार्की भदौ २३ र २४ गतेको जेन–जी आन्दोलनपछि सत्तामा पुगेकी हुन्। सो आन्दोलनले तत्कालीन प्रधानमन्त्री केपी शर्मा ओलीको सरकारलाई ढालेर नयाँ सत्ता समीकरण निर्माण गरेको थियो। आन्दोलनको क्रममा सडकमा देखिएको असन्तोष नियन्त्रण गर्न र राजनीतिक सहमति बनाउन नेपाली सेनाको पहल निर्णायक बनेको बताइन्छ।
कार्कीलाई प्रधानमन्त्री बनाउन सेनाले पृष्ठभूमि तयार गरेको भनाइ राजनीतिक वृत्तमै छ। सेनाको सो भूमिकाबारे विभिन्न व्याख्या भए पनि, स्थायित्व कायम गर्न र हिंसात्मक झडप विस्तार रोक्न सेना सक्रिय भएको ठानिन्छ। यसै कारण, प्रधानमन्त्री बनेपछि सेनापति सिग्देलसँग भएको उनको पहिलो भेटलाई असाधारण महत्वका साथ हेरिएको हो।
भेटमा देशको शान्ति–सुरक्षा अवस्था मूल्याङ्कन गर्नका साथै आन्दोलनपछि उत्पन्न राजनीतिक अनिश्चितता समाधान गर्ने उपायबारे समेत कुराकानी भएको बताइएको छ। स्रोतका अनुसार, प्रधानमन्त्री र सेनापतिको सहकार्य आगामी दिनमा सरकारको नीति–निर्देशन र सुरक्षा संयन्त्र सञ्चालनमा आधारभूत हुने अपेक्षा गरिएको छ।
सिंहदरबार प्रवेश गरेर प्रधानमन्त्रीसँग भेटघाट गरेको यो अवसर सेनापति सिग्देलको कार्यकालकै पहिलो उच्चस्तरीय भेट हो। यसलाई राजनीतिक स्थायित्व र सेना–सरकारबीचको विश्वास निर्माणतर्फको संकेतका रूपमा पनि लिइएको छ।
प्रकाशित मिति: मंगलबार, असोज ७, २०८२
