काठमाडौं । हामी नेपालका संयोजक सुदन गुरुङले आफू संविधान दिवसको अवसरमा शीतलनिवासमा आयोजित चियापान तथा शुभकामना आदानप्रदान कार्यक्रममा पुराना नेताहरूको ‘शिर नउठोस्’ भन्ने उद्देश्यले मात्रै उपस्थित भएको स्पष्ट पारेका छन्।
शनिबार सार्वजनिक भिडियो सन्देशमार्फत उनले कार्यक्रममा सहभागी भएको विषयमा व्यापक प्रश्न उठेकाले स्पष्टीकरण दिएका हुन्।
गुरुङले भने, ‘‘सबैलाई लागेको छ म त्यहाँ सेलिब्रेट गर्न गएको हो कि ? तर त्यो गलत हो । म सुरुमा जानै नचाहेको थिएँ । तर जब थाहा पाएँ पुराना नेताहरू पनि आउने रहेछन्, अनि उनीहरू शिर उचालेर हिँड्छन् भन्ने सोचेर म पुगेको हुँ ।’’
उनका अनुसार कार्यक्रममा कुनै नेतासँग बस्ने कुरा भएन, बरु आफू अलग्गै उभिएरै बसे। ‘‘चिया खाऊँ भनिएको थियो, खाइनँ । पानी पनि खाइनँ । अशुद्ध हुन्छु भन्ने सोचले मैले केही पनि खाइनँ,’’ उनले बताए।
शीतलनिवासमा आयोजित सो कार्यक्रममा पूर्वराष्ट्रपति, पूर्वप्रधानमन्त्री, निवर्तमान सांसददेखि नयाँ पुस्ताका अगुवाहरू सहभागी भएका थिए। त्यही कार्यक्रममा देखिएका गुरुङबारे सामाजिक सञ्जालमा आएका विभिन्न टिप्पणीलाई उनले यसरी खण्डन गरेका हुन्।
प्रकाशित मिति: शनिबार, असोज ४, २०८२
