काठमाडौं । नेकपा एमालेका सचिव योगेश भट्टराईले लोकतान्त्रिक प्रक्रियालाई मजबुत बनाउन निर्धारित समयमा निर्वाचन गर्नुपर्ने स्पष्ट प्रतिवद्धता व्यक्त गरेका छन्।
बुधबार च्यासलस्थित पार्टी केन्द्रीय कार्यालयमा सञ्चारकर्मीहरूसँग कुरा गर्दै उनले देशले भोगिरहेको संकटको समाधान लोकतान्त्रिक अभ्यासमै रहेको उल्लेख गरे। पार्टीलाई नयाँ ढंगले अघि बढाउने संकल्पसहित निर्वाचन तयारीमा जुटिएको पनि उनले बताए।
जेन–जी आन्दोलनका क्रममा देशभर भएका क्षतिको विवरण संकलन भइरहेको जनाउँदै उनले संरचना, कागजात र गाडीसमेत जलेर नष्ट भएको एमाले कार्यालयको अवस्थाबारे जानकारी दिए। भट्टराईले कांग्रेससहित अन्य दलका कार्यालयमा भएको क्षतिको पनि अनुगमन भइरहेको बताए।
‘यो कठिन घडीमा दलहरूबीच सहानुभूति र सहकार्य आवश्यक छ,’ उनले भने, ‘जहाँ–जहाँ संरचना जलेका छन्, त्यहाँका लागि दुःख र सहानुभूति व्यक्त गर्दछौं।’
उनका अनुसार पर्सि पर्ने संविधान दिवसलाई एमालेले मृतकप्रति श्रद्धाञ्जलि र संविधानको स्मरणका रूपमा मनाउनेछ। साथै, शान्तिपूर्ण ढंगले निर्वाचन सम्पन्न गर्ने र लोकतान्त्रिक प्रक्रियालाई पुनः लयमा फर्काउने संकल्प गर्ने दिन पनि संविधान दिवसकै अवसरमा हुने उनले प्रष्ट पारे।
प्रकाशित मिति: बुधबार, असोज १, २०८२
-1757752153.jpg)
