काठमाडौं । संयुक्त अरब इमिरेट्स (यूएई) ले सोमबारदेखि नेपालीका लागि भिजिट भिसा र मंगलबारदेखि कामदार भिसा समेत रोक लगाएपछि हजारौँ नेपाली युवाको वैदेशिक रोजगारी योजना प्रभावित भएको छ।
वैदेशिक रोजगार व्यवसायीहरूको भनाइअनुसार, विभिन्न कम्पनीहरूले कामदार भिसाका लागि पेश गरेका निवेदन अस्वीकृत भएका छन्। सुरुमा भिजिट भिसा मात्रै रोकिएको भए पनि भोलिपल्टै कामदार भिसा समेत बन्द भएपछि म्यानपावर कम्पनी र विदेश जान तयारी गरिरहेका नेपाली युवाहरू अन्यौलमा परेका छन्।
नेपालमा हालसालै भएका जेन–जी आन्दोलन, तोडफोड, आगजनी तथा कैदीबन्दी फरार भएका घटनालाई यस निर्णयसँग जोडेर चर्चा भए पनि आधिकारिक पुष्टि भने भएको छैन। अबुधाबीस्थित नेपाली दूतावासले समेत औपचारिक जानकारी प्राप्त नभएको जनाएको छ।
यसअघि अबुधाबी र दुबई राज्यमार्फत भिजिट भिसा रोकिए पनि सारजाहमार्फत सुविधा उपलब्ध थियो। तर अहिले त्यो बाटो समेत बन्द भएपछि वैदेशिक रोजगारी व्यवसायी र युवाहरू थप समस्यामा परेका छन्।
यूएईले यसअघि इजिप्ट, पाकिस्तान, बंगलादेश, इथियोपिया र युगाण्डाका नागरिकका लागि भिसा रोक लगाएको थियो। अब सोही सूचीमा नेपाल पनि थपिएको छ।
यसबीच, सारजाहमा यसै महिनाको अन्त्यतिर आयोजना हुने नेपाल र वेस्ट इन्डिजबीचको क्रिकेट खेलमा समेत असर पर्न सक्ने देखिएको छ। खेलाडीहरूले दूतावासमार्फत भिसा पाउने सम्भावना भए पनि व्यवसायी र दर्शकहरूलाई समस्या हुने अनुमान गरिएको छ।
यूएईको अध्यागमनले हाल नेपाली नागरिकका सबै भिसा आवेदन अस्वीकार गरेको छ। यो रोक अस्थायी हो वा दीर्घकालीन भन्नेबारे भने अझै प्रष्ट खुलासा भएको छैन।
प्रकाशित मिति: बुधबार, असोज १, २०८२
