काठमाडौं । पूर्वप्रधानमन्त्री तथा नेपाल समाजवादी पार्टी (नयाँ शक्ति) का अध्यक्ष बाबुराम भट्टराईले आवधिक निर्वाचन तोकिएको मितिमै गर्नुपर्नेमा जोड दिएका छन्।
न्युज एजेन्सी नेपालसँग कुरा गर्दै उनले बहुदलीय लोकतन्त्रको मूल आधार नै प्रतिष्पर्धी, स्वतन्त्र र निष्पक्ष ढंगले हुने आवधिक निर्वाचन भएको भन्दै यसलाई कुनै हालतमा कमजोर पार्न नहुने बताए।
उनका अनुसार चुनाव समयमै गराउन सबै राजनीतिक दलले जिम्मेवारीपूर्वक भूमिका निर्वाह गर्नुपर्नेछ। तर पुराना दलहरू — नेपाली कांग्रेस, नेकपा एमाले, नेकपा माओवादी केन्द्र र राप्रपा — मा अझै पनि पुराना नेताहरूकै उकुसमुकुस रहेको भन्दै तिनले आफूलाई प्रभावकारी रूपमा पुनः संरचना गर्न सक्ने सम्भावना न्यून रहेको उनले टिप्पणी गरे।
भट्टराईले भने, “चौथो पुस्ता आइसकेको छ, तर पुराना नेताहरूको मानसिकता परिवर्तन भएको छैन। मेरो अनुमानमा आगामी दिनमा एक किसिमको बृहत् राजनीतिक पुनः संरचना हुन्छ। यदि २८ वर्षमुनिका युवाहरूले दबाब बनाइरहे, त्यो सम्भव छ।”
उनले कहिलेकाहीँ अपेक्षित नतिजाभन्दा अनपेक्षित परिणाम पनि आउने भएकाले राजनीतिक दलहरू सतर्क रहनुपर्ने सुझावसमेत दिए।
अन्तरिम सरकारले आगामी फागुन २१ गते प्रतिनिधि सभा निर्वाचनको मिति तोकेको छ। तर प्रमुख दलहरूले भने प्रतिनिधि सभा विघटनलाई असंवैधानिक भन्दै आपत्ति जनाइरहेका छन्।
प्रकाशित मिति: बुधबार, असोज १, २०८२
