काठमाडौं । जेनजी आन्दोलनका क्रममा कर्तव्य पालनाको क्रममा ज्यान गुमाएका प्रहरीप्रति सरकारले कुनै ठोस निर्णय नगरे पनि प्रहरी संगठन आफैले मृतक परिवारलाई राहत दिने घोषणा गरेको छ ।
प्रहरी प्रधान कार्यालयले सोमबार सार्वजनिक गरेको निर्णयअनुसार, प्रहरी निरीक्षकदेखि आईजीपीसम्मका सबै अधिकृत र जवानहरूको तलब कट्टा गरेर जम्मा गरिने रकमबाट मृतक प्रहरीका परिवारलाई १० लाख रुपैयाँ उपलब्ध गराइने भएको छ ।
प्रहरी प्रवक्ता विनोद घिमिरेले जारी गरेको विज्ञप्तिमा भनिएको छ, “कर्तव्य पालनाको क्रममा जीवन गुमाउनुभएका प्रहरी शहिदका परिवारलाई राहत उपलब्ध गराउने उद्देश्यले यो निर्णय गरिएको हो ।”
यसअघि जेनजी आन्दोलनमा सहभागीहरूद्वारा प्रहरीलाई लक्षित आक्रमण भएका थिए । प्रहरीलाई ढुंगामुढा, पेट्रोल बम आक्रमण मात्र होइन, कुटपिट गरी ज्यानै जाने घटना समेत भएका छन् । आन्दोलन नियन्त्रणका क्रममा आफ्ना सहकर्मीहरूको निर्मम हत्या भएको दृश्यले प्रहरी संगठनलाई गहिरो पीडा दिएको छ ।
तर विडम्बना, प्रहरी संगठनका शहादतप्रति सरकारले अहिलेसम्म कुनै ठोस निर्णय वा विशेष व्यवस्था नगरेको भन्दै प्रहरीभित्रै असन्तोष बढ्दो छ । राज्यको तर्फबाट अपेक्षित समर्थन नपाएपछि अन्ततः प्रहरी प्रधान कार्यालय आफैले शहादतप्रति सम्मानस्वरूप यस्तो कदम चाल्न बाध्य भएको हो ।
समाजले प्रायः प्रहरीलाई केवल बल प्रयोग गर्ने शक्तिको रूपमा मात्रै हेर्ने गरे पनि आन्दोलन नियन्त्रणमा ज्यान गुमाउनेहरूमाथि त्यति संवेदनशीलता देखिएको छैन । तर प्रहरीभित्रैको यो पहलले संगठनलाई अझ एकताबद्ध बनाउने अपेक्षा गरिएको छ ।
यो कदमले प्रहरी संगठनको आत्मबल उकास्ने भए पनि, राज्यसत्ताले शहादतलाई बेवास्ता गर्नु दीर्घकालीन हिसाबले गम्भीर प्रश्न बनेको छ ।
प्रकाशित मिति: सोमबार, भदौ ३०, २०८२
