काठमाडौं । नेपाली कांग्रेसका नेता तथा पूर्वमन्त्री मोहन बस्नेतले आफ्नो घर ध्वस्त पारिएको घटनामा माओवादीको सक्रिय सहभागिता रहेको आरोप लगाएका छन्। आज भग्नावशेष अगाडि बसेर बस्नेतले सो घटनामा स्वदेशीसँगै विदेशीहरूको समेत संलग्नता देखिएको बताए र घोर आक्रोश व्यक्त गरे।
उनले आफ्नो भाषणमा भने : यो माओवादीको सक्रियतामा भएको काम हो। तर यहाँ स्वदेशी मात्र छैनन्, विदेशी पनि देखिएका छन्।” बस्नेतले देश र प्रजातन्त्रको रक्षा भन्दै चुप बस्ने स्थितिमा नरहने बताएका छन् र आफ्नो लामो राजनीतिक संघर्ष र परिवारको बलिदान स्मरण गरे।
बस्नेतले थप प्रकाश पारे: प्रहरी र सेनाले आफूलाई पर्याप्त सुरक्षा दिन नसकेको र सुरक्षाका मामिलामा असन्तोष रहेको बताएका छन्। उनले आन्दोलनको नाममा देशभरि आतंक फैलिरहेको र त्यो आन्दोलनमा स्पष्ट कमाण्डर नभएकाले अस्थिरता फैलिएको टिप्पणी पनि गरे। सर्वोच्च अदालत र सिंहदरबारमा आगजनी गरिएकाले देशमा गम्भीर समस्या आएको उनको दाबी छ।
चुनावका सम्भावनाबारे प्रश्न गर्दा बस्नेतले संविधान मिचिएको बताउँदै भने— “अब चुनाव त के होला, चुनाव भए कांग्रेस भाग्दैन। तिमीहरू सबैको जमानत जफत गरिन्छ — माओवादीका छाउरा हुन्।” उनले जेएनजी आन्दोलनका नाममा चलेको आन्दोलनपछि कानून–व्यवस्था बिग्रिएको र विभिन्न व्यक्तिहरूले हिंसा प्रवृत्तिमा लागेको आरोप लगाए।
बस्नेतले आफ्ना जग्गा–सम्पत्ति सम्बन्धी आरोप–प्रत्यारोपको जवाफ दिँदै भने कि उनको जग्गा ५६ सालमै किनेको हो र आफैंले विकास तथा सार्वजनिक पूर्वाधार निर्माणमा योगदान गरेको स्मरण गराए। वर्तमान सरकारले तीन दिनसम्म मन्त्रिपरिषद गठन नगरेको कुरामा असन्तोष जनाउँदै उनले आवश्यक भए कांग्रेसले प्रजातन्त्र र जनताको सुरक्षा गर्ने दायित्व ग्रहण गर्ने चेतावनी दिए।
उनले छिमेकी र स्थानीयहरुलाई सतर्क रहन र चोरी, लुटपाटजस्ता घटनाबाट जोगिन आग्रह गरे। अन्त्यमा बस्नेतले आफूमाथि थप आक्रमणका खतरा बढ्न सक्ने भए पनि देश र जनताको लागि लड्न आफू तयार रहेको भने।
प्रकाशित मिति: आइतबार, भदौ २९, २०८२
