काठमाडौं । बारबरा फाउन्डेसनले जेनजी आन्दोलनमा आफ्नो नाम जोडेर भइरहेको भ्रामक प्रचारप्रति आपत्ति जनाएको छ । आइतबार काठमाडौंमा आयोजित पत्रकार सम्मेलनमा फाउन्डेसनका अध्यक्ष डा. सन्दुक रुइतले ‘हामी नेपाल’ नामक संस्थासँग हाल कुनै पनि सहकार्य नरहेको स्पष्ट पारे ।
उनका अनुसार कोभिड महामारीको समयमा केही कार्यक्रमहरूमा सहकार्य भए पनि हाल सो संस्था वा त्यसका पदाधिकारीसँग आर्थिक वा कार्यक्रमगत सम्बन्ध नरहेको हो । उनले आन्दोलनलाई लिएर बारबरा फाउन्डेसनले आर्थिक सहयोग गरेको भन्ने दाबी पूर्णतः असत्य भएको बताए ।
“नागरिकलाई मूल मुद्दाबाट भड्काउने उद्देश्यले फाउन्डेसनको चरित्र हत्या गर्ने प्रयास भइरहेको छ, कृपया यस्तो नगर्नुहोस्,” डा. रुइतले भने ।
पत्रकार सम्मेलनमा फाउन्डेसनले आफ्नो वित्तीय विवरण पनि सार्वजनिक गरेको थियो । विगत आठ वर्षमा ब्याज आम्दानीलगायत गरेर करिब ७ करोड ८२ लाख रुपैयाँ प्राप्त भएको र हाल करिब ३ करोड ९५ लाख रुपैयाँ बैंकमा मौज्दात रहेको जानकारी दिइयो ।
प्रकाशित मिति: आइतबार, भदौ २९, २०८२
