काठमाडौं । नेकपा (एमाले)का वरिष्ठ नेताहरू शंकर पोखरेल र प्रदीप ज्ञवालीले मुलुकमा उत्पन्न असामान्य परिस्थितिप्रति गहिरो चिन्ता प्रकट गर्दै संयुक्त वक्तव्य जारी गरेका छन् ।
भ्रष्टाचार विरोधी आन्दोलनमा प्रहरी गोलीबाट १९ जना युवाको निधन र ४ सयभन्दा बढी घाइते भएको घटनाप्रति दुःख व्यक्त गर्दै उनीहरूले श्रद्धाञ्जली अर्पण र पीडित परिवारप्रति समवेदना प्रकट गरेका छन् । वक्तव्यमा घाइतेहरूको शीघ्र स्वास्थ्य लाभको कामना गर्दै घटनाको निष्पक्ष छानबिन र दोषीमाथि कानुनअनुसार कारबाही गर्न माग गरिएको छ ।
वक्तव्यमा भनिएको छ, “देशैभर भएका आगजनी, तोडफोड र लुटपाटका घटनाले मुलुक स्तब्ध भएको छ । संघीय संसद भवन, राष्ट्रपति भवन, सिंहदरबार, सर्वोच्च अदालतसहित सयौँ संरचना ध्वस्त भएका छन् । दुर्लभ अभिलेख र दस्तावेज नष्ट भएका छन् । होटल, स्टोर, गाडी शोरुमदेखि बैंकसम्म सार्वजनिक तथा निजी सम्पत्तिमा खर्बौँको नोक्सानी भएको छ ।”
नेताहरूले जेलबाट हजारौँ कैदीबन्दी भाग्नुलाई गम्भीर चुनौतीको रूपमा लिँदै त्यसमा कसको संलग्नता छ भन्नेबारे यथार्थ छानबिन आवश्यक रहेको बताए । साथै, सुरक्षा निकायको भूमिकासमेत समीक्षायोग्य रहेको उनीहरूको भनाइ छ ।
“यस्तो प्रतिकूल अवस्थामा सिंगो पार्टी पंक्ति अविचलित, एकताबद्ध र भविष्यप्रति आशावादी बन्नुपर्छ । निरङ्कुशतन्त्रदेखि द्वन्द्वसम्मका चुनौती जितेर यहाँसम्म आइपुगेका हामी यसपटक पनि सफल हुनेमा दृढ छौँ,” वक्तव्यमा भनिएको छ ।
प्रधानमन्त्रीको राजीनामापछिको राजनीतिक निकास संविधानसम्मत र लोकतान्त्रिक बाटोमै खोजिनुपर्नेमा जोड दिँदै उनीहरूले राष्ट्रपतिलाई सार्थक संवाद सुरु गर्न आग्रह गरेका छन् । युवापुस्ताले उठाएका मागलाई संविधानसम्मत ढंगले सम्बोधन गर्न पनि उनीहरूको सुझाव छ ।
देशभर भइरहेको लुटपाट, आगजनी र तोडफोड नियन्त्रणका लागि नेपाली सेना लगायत सबै सुरक्षा निकायलाई प्रभावकारी भूमिका खेल्न आग्रह गर्दै उनीहरूले भनेका छन्, “राष्ट्र, लोकतन्त्र र कम्युनिष्ट आन्दोलन गम्भीर चुनौतीमा छन्, तर हामी एकताबद्ध भएर अगाडि बढ्नेछौँ ।
हेरौं वक्तव्य :
प्रकाशित मिति: बुधबार, भदौ २५, २०८२
