काठमाडौं । नेकपा एमालेका सचिव योगेश भट्टराईले पछिल्ला राजनीतिक घटनाक्रम र आन्दोलनले उत्पन्न गरेको अस्थिरतालाई सम्बोधन गर्दै नेता तथा कार्यकर्ताका लागि १० बुँदे सुझाव सार्वजनिक गरेका छन्। सामाजिक सञ्जालमार्फत जारी गरिएको उक्त प्रस्तावलाई धेरैले एमाले पुनर्गठनतर्फको एउटा संकेतका रूपमा लिएका छन्।
भट्टराईले नेपालको वर्तमान परिस्थिति इतिहासकै गम्भीर संकट हो भन्दै यसलाई ‘उत्तेजनामा प्रतिक्रिया दिएर होइन, गहिरो आत्मसमीक्षा र नयाँ दृष्टिकोणसहित’ मात्र सामना गर्न सकिने बताए। उनका अनुसार, पार्टीलाई पुनर्जीवित र बलियो बनाउन आत्मालोचना, संगठनात्मक सुधार र जनतासँग प्रत्यक्ष सम्पर्क अनिवार्य छ।
मुख्य सुझावहरू :
पार्टी नेतृत्व र संरचनाको पुनर्गठन — एकता कायम हुने गरी सावधानीपूर्वक नयाँ नेतृत्व निर्माण।
आम सदस्यको सक्रिय सहभागिता — पार्टीलाई सदस्यमैत्री र समावेशी बनाउन पहल।
आन्तरिक लोकतन्त्र र पारदर्शिता — सबै निर्णय प्रक्रिया स्पष्ट र लोकतान्त्रिक बनाउन आग्रह।
जनतामा प्रत्यक्ष सम्पर्क — नागरिकको आवाज सुनेर नीतिगत निर्णयमा प्रतिबिम्बित गर्ने अठोट।
लोकतान्त्रिक मूल्यमा अडान — बहुदलीय व्यवस्था, प्रेस स्वतन्त्रता, मानवअधिकार र संविधानको सर्वोच्चता कायम राख्ने प्रतिज्ञा।
देश पुनर्निर्माणको अभियान — संकटबाट उठेर सहकार्यमार्फत देश पुनर्निर्माण गर्ने संकल्प।
हिमाल, पहाड, तराई र विविधताबीचको एकता — जातीय, भाषिक र सांस्कृतिक सहअस्तित्वलाई अझ सबल बनाउने प्रस्ताव।
आन्तरिक सहमति र संवैधानिक निकास — लोकतान्त्रिक मूल्यअनुरूप समाधान खोज्ने र त्यसलाई विश्व समुदायबाट समर्थन गराउने योजना।
अन्तर्राष्ट्रिय सहकार्य — नेपालीको सामूहिक प्रयासलाई अन्तर्राष्ट्रिय जगतले साथ दिनुपर्ने आह्वान।
जेन-जी आन्दोलनका मागमा समर्थन — भ्रष्टाचार र बेथिति अन्त्य गर्ने युवाको अभियानलाई एमालेले आत्मसात गर्दै कार्यान्वयनमा सहयोग गर्ने प्रतिवद्धता।
भट्टराईले आफ्नो संदेशमा पार्टीभित्रको कमजोरी स्वीकार गर्न तयार हुनु नै भविष्यको बाटो खुल्ने पहिलो कदम भएको उल्लेख गरेका छन्। उनका अनुसार, “खरानीबाट उठेर पुनर्निर्माण गर्ने समय यही हो, र यसको केन्द्रमा लोकतन्त्र, पारदर्शिता र जनताको विश्वास हुनुपर्छ।”
प्रकाशित मिति: बुधबार, भदौ २५, २०८२
