काठमाडौं । प्रधानमन्त्री केपी शर्मा ओलीले प्रतिबन्धित सामाजिक सञ्जालहरु तत्काल खोल्न नसकिने अडान लिएका छन्।
यसअघि, मन्त्रिपरिषद् बैठकअघि बसेको नेपाली कांग्रेस पदाधिकारी तथा पूर्वपदाधिकारीको बैठकले सामाजिक सञ्जालहरुको प्रतिबन्ध हटाउन सरकारलाई आग्रह गर्ने निर्णय गरेको थियो। स्वास्थ्य तथा जनसंख्या मन्त्री प्रदीप पौडेलले पार्टी निर्णयबारे प्रधानमन्त्रीलाई जानकारी दिँदै भने, ‘जे क्षति भयो, त्यसको उचित मूल्याङ्कन गर्दै आन्दोलनकारीको माग सम्बोधन गर्नुपर्छ। सामाजिक सञ्जाल दर्ता प्रक्रिया कूटनीतिक ढंगले अघि बढाउँदै तत्काल खोल्न पहल गर्नुपर्छ।’
तर प्रधानमन्त्री ओलीले जवाफ दिनुभयो, ‘सभापतिज्यूले पनि भन्नुभएको थियो। तर कम्पनीहरुले खुलेआम दर्ता गर्न तयार छैनन्। नियमन नगरी यतिकै खोल्न सकिंदैन।’
यसपछि गृहमन्त्री रमेश लेखकले पनि सामाजिक सञ्जाल खुलाउने प्रस्ताव राखेका थिए, तर प्रधानमन्त्रीले अनुमोदन गर्नुभएन। बैठकपछि ओली र सभापति देउवा बालुवाटारमै भेटवार्ता गर्दै छन्।
प्रकाशित मिति: सोमबार, भदौ २३, २०८२
