काठमाडौँ । देशका विभिन्न ठाउँमा चिकित्सकलाई लक्षित गरी भएका साङ्घातिक आक्रमण र स्वास्थ्य संस्थामा अस्वाभाविक हुलहुज्जत र गुण्डागर्दी बढेको भन्दै नेपाल चिकित्सक सङ्घले आपत्ति जनाएको छ ।
२७ भदौमा हेटौँडाको सञ्चो अस्पतालमा दुई चिकित्सकमाथि आक्रमण भएयता बुटवल, लमजुङ, मणिपाल शिक्षण अस्पताल पोखरा, विराटनगर, बघौडा अस्पताल चितवन, पाटन अस्पताल लगायतमा चिकित्सक तथा स्वास्थ्यकर्मीमाथि साङ्घातिक आक्रमण भएको सङ्घले जनाएको छ ।
हेटौडामा भएको घटनालाई लिएर सरकारसँग सम्झौता गरेको एक हप्ता नपुग्दै देशको विभिन्न स्थानमा चिकित्सकमाथि आक्रमण हुनुले स्वास्थ्य सेवा प्रवाहमा गम्भीर असर पुर्याएको सङ्घको ठहर छ ।
‘‘सरकार समक्ष गरिएको सम्झौताको हप्ता दिन पनि नहुँदै देशका विभिन्न स्थानमा चिकित्सकहरूलाई लक्षित गरी साङ्घातिक आक्रमण गरेर गम्भीर घाइते बनाइनु तथा स्वास्थ्य संस्थामा अत्यन्तै अस्वाभाविक, अनियन्त्रित हुलहुज्जत र गुण्डागर्दीले नेपालको स्वास्थ्य सेवा प्रवाहमा गम्भीर असर पुर्याएको छ’ सङ्घका महासचिव डा. सञ्जीव गिरीले विज्ञप्तिमा भनेका छन् ।
चिकित्सकमाथि आक्रमण गर्नेलाई स्वास्थ्यकर्मी तथा स्वास्थ्य संस्थाको सुरक्षा सम्बन्धी ऐन २०६६ र पहिलो संशोधन ऐन २०७९ बमोजिम कानूनी कारबाही नगरिनु, सुरक्षाकर्मीहरूको भूमिका शङ्कास्पद हुनु तथा समग्र स्वास्थ्यकर्मीहरू अत्यन्तै असुरक्षित र भयभित भइरहेको विद्यमान अवस्थामा नियमित स्वास्थ्य सेवा प्रवाह गर्न सक्ने वातावरण नभएको सङ्घले उल्लेख गरेको छ ।
पोखरामा चिकित्सकमाथि लाठीचार्ज र हिरासतमा राखिएको घटनाले कानुनी राज्यको उपहास भएको समेत सङ्घले जनाएको छ । सङ्घले दोषीलाई कानुनको दायरामा ल्याई चिकित्सकीय सेवामा संलग्न जनशक्तिको सुरक्षा र कानुनी राज्य छ भन्ने प्रत्याभूति दिलाउन सरकारलाई आग्रह गरेको छ ।
सङ्घले चिकित्सकमाथि भइरहेका आक्रमणको घटनाका विषयमा भावी दिनमा अवलम्बन गर्नुपर्ने रणनीतिक भूमिकाका विषयमा छलफल गर्न भोलि १० गते विस्तारित बैठक बोलाएको छ । बैठकमा अस्पतालका निर्देशक, सङ्घका पूर्व पदाधिकारी, परिषद्का सदस्य, विभिन्न विशेषज्ञ सोसाइटीका पदाधिकारीहरू, सङ्घका शाखा कार्यालयका अध्यक्ष एवं सचिवहरू, रेजिडण्ट एशोसिएसनका पदाधिकारीहरू सहभागी हुने चिकित्सक सङ्घले बताएको छ ।
प्रकाशित मिति: मंगलबार, असोज ९, २०८० १७:२०
