सल्यान : जेलभित्र निर्माणका काम मात्र गर्न पाइन्छ भन्ने सुनेकाहरूलाई अब अर्को खबर थपिएको छ, जेलभित्रै पढ्न पाइन्छ । हो, जिल्ला कारागार सल्यानमा पुस्तकालय स्थापना गरिएपछि कैदीले पढ्न पाउने भएका हुन् । विभिन्न अभियोगमा सजाय भोगिरहेका कैदीबन्दीलाई जीवन जिउने कला तथा सकारात्मक सन्देश दिने उद्देश्यले पुस्तकालयको स्थापना गरिएको हो ।
‘किताब पढौँ जीवनलाई बदलौँ, कर्णाली प्रदेशका कारागारलाई किताब अभियानमा सहभागी बनौँ’ भन्ने नाराका साथ कर्णाली प्रदेश प्रहरी कार्यालयले कर्णालीका सबै जिल्लामा सञ्चालन गरेको अभियानअन्तर्गत सल्यानमा पनि पुस्तकालय स्थापना गरेको हो ।
कारागारका बन्दीको जीवनमा सकारात्मक सोच ल्याउन पुस्तकालयको स्थापना गरिएको कारागारलाई किताब अभियान उपसमितिका संयोजक तथा जिल्ला प्रहरी कार्यालय सल्यानका प्रहरी नायब उपरीक्षक वीरेन्द्रबहादुर शाहीले जानकारी दिए ।
कारागारभित्र बसेर समय बिताउनुभन्दा पुस्तक पढेर जीवन परिवर्तन गर्नसक्ने कारागारमा गठित बुक क्लबका संयोजक मोहन थापाले बताए । उनले भने, ‘सीप सिकेकाले आफ्नो कार्यमा धेरै समय व्यस्त हुने भए पनि किताब पढेर मनमा सकारात्मक सोचको विकास गर्न सकिन्छ ।’ उपन्यासकार उमा सुवेदीले पुस्तक पढ्ने एउटा योग भएकाले यसको अध्ययनबाट सुखदुःखको अनुभूति गर्न सकिने बताइन् ।
बुक क्लबले कारागारमा प्रत्येक महिना कैदीसँग समीक्षा गर्ने छ । कैदीले अध्ययन गरेको पुस्तकको समीक्षा र अध्ययनका आधारमा महीनाभरि सबैभन्दा बढी पुस्तक अध्ययन गर्ने कैदीलाई पुरस्कृत गरिने छ । सल्यान कारागारमा स्थापना गरिएको पुस्तकालयमा झण्डै साढे छ हजार पुस्तक राखिएको छ । कैदीलाई नयाँ ज्ञान र सकारात्मक सोचको विकास गर्न जीवनउपयोगी पुस्तकहरू बढी राखिएको बताइएको छ ।
प्रकाशित मिति: आइतबार, चैत २४, २०७५
