काठमाडौं : बारा र पर्साका हावाहुरी प्रभावितका लागि राहतस्वरूप कर्णाली प्रदेश सरकारले एक करोड रुपैयाँ उपलब्ध गराउने भएको छ । शनिबार बसेको मन्त्रिपरिषद् बैठकले मुख्यमन्त्री राहत कोषमा उक्त रकम जम्मा गर्ने निर्णय गरेको हो ।
प्रदेशसभाका पछिल्ला बैठकमा विपक्षी दल नेपाली काङ्गे्रसका सांसदहरूले प्रदेश नं २ मा ठूलो विपत्ति आउँदा कर्णाली सरकार मौन बसेको भन्दै सरकारको आलोचना गरेका थिए । यसअघि काङ्गे्रस संसदीय दलले हावाहुरी प्रभावित परिवारको सहयोगका लागि ४२ हजार रुपैयाँ मुख्यमन्त्री राहत कोषमा जम्मा गरिसकेको छ ।
आन्तरिक मामिला तथा कानुनमन्त्री नरेश भण्डारीका अनुसार बैठकले वीरेन्द्रनगरस्थित प्रदेश अस्पताललाई शिक्षण अभ्याससहितको तीन सय श्ययाको प्रेषण (रेफरल) अस्पतालका रूपमा स्तरोन्नति गर्ने निर्णय गरेको छ । हाल ५० श्ययाको उक्त अस्पताललाई सामाजिक विकास मन्त्रालयको प्रस्तावमा मन्त्रिपरिषद्ले शिक्षण अस्पतालका रूपमा स्तरोन्नति गर्ने निर्णय गरेको हो ।
प्रकाशित मिति: आइतबार, चैत २४, २०७५
