काठमाडौं : चैत्र शुक्ल प्रतिपदाअर्थात् आज शनिबार चैतेदसैँ (चैत्र नवरात्र) सुरु भएको छ । यस पर्वमा दुर्गा भवानीको विशेष उपासना गरिन्छ ।
आश्विन शुक्ल पक्षमा पर्ने दसैँ अर्थात् बडादसैँ जति भव्यरूपमा नमनाइए पनि चैतेदसैँमा देशभरका शक्तिपीठमा भक्तजनको भीड लाग्ने गर्छ । वैदिक सनातन धर्मावलम्बीले घरघरमा शक्तिको उपासना स्वरूप देवीको पूजाआजा गर्नुका साथै देवीभागवत, दुर्गा सप्तशती चण्डी, देवी स्तोत्रलगायत देवीको महिमा गाइएको ग्रन्थ पाठ गरिन्छ ।
चैत्र शुक्ल अष्टमी र नवमीलाई भने देशभर विशेष रूपमा मनाउने गरिन्छ । अष्टमीलाई चैतेदसैँ र नवमीलाई रामनवमी पर्वका रूपमा मनाउने गरिएको हो । यस वर्ष चैत ३० गते अष्टमी र वैशाख १ गते नव वर्षका दिन रामनवमी पर्व परेको छ ।
वर्षमा चार नवरात्र पर्छन् । चैत, असार, आश्विन र पुस महिनाको शुक्ल पक्षमा नवरात्र पर्ने नेपाल पञ्चांग निर्णायक समितिका अध्यक्ष एवं धर्मशास्त्रविद् प्राडा. रामचन्द्र गौतमले जानकारी दिए । चार नवरात्रमध्ये चैत र आश्विनका नवरात्रलाई विशेष रूपमा मनाउने गरिएको छ ।
आषाढ र पौषका दुई नवरात्रमा भने साधना मात्र गरिन्छ । यी दुई नवरात्रलाई सुषुप्त दसैँ भन्ने गरिएको उनले बताए । चैत्र नवरात्र सुरु भएको अवसरमा आज बिहानैदेखि देशभरका शक्तिपीठमा भक्तजनको भीड लागेको छ । उपत्यकाका गुह्येश्वरी, जयबागेश्वरी, मैतीदेवी, नक्साल भगवती, भद्रकाली, शोभा भगवती, कालिकास्थान, बज्रयोगिनी, इन्द्रायणी, सुन्दरीमाईलगायत पीठमा भक्तजनको भीड लागेको छ ।
यसैगरी उपत्यका बाहिरका पलाञ्चोक भगवती, चण्डेश्वरी, नाला भगवती, पाल्चोक भगवती, शैलेश्वरी, बागेश्वरी, गहवामाई, मनकामना, कालिकादेवीलगायत शक्तिपीठमा पनि बिहानैदेखि भक्तजनको भीड लागेको छ । नवरात्रका अवसरमा शक्तिपीठमा गई पूजाआजा एवं दर्शन गरेमा शक्ति प्राप्त हुने विश्वास छ ।
प्रकाशित मिति: शनिबार, चैत २३, २०७५
