बझाङ: जिल्लाको बुंगल नगरपालिका–११ देउलीकोटमा एकै घरका चार जनामा अपांगता भएपछि परिवारका सदस्यलाई छाक टार्न समस्या भएको छ ।
घरका मूलीसहित परिवारका सबै सदस्यमा अपांगता भएपछि उनीहरूको दैनिक रोजीरोटीमा समस्या भएको हो । ४५ वर्षीया नरि बोहरा, उनकी श्रीमती ४२ वर्षीया भागादेवी र दुई छोरा १४ वर्षीया रवीन्द्र र १२ वर्षीय नवीनलाई अपांगता भएपछि परिवार सधैँ समस्यामा पर्दै आएको छ । काम गर्ने अर्को मान्छे कोही नभएपछि बोहरा परिवार जिल्लाका विभिन्न ठाउँमा माग्दै गुजारा चलाउने गर्छन् ।
घरका सबैमा अपांगता भएकाकाले यो परिवारलाई जीवन धान्न समस्या छ । घरमूली रहेका नरिको दाँया खुट्टामा समस्या भएकाले हिँडडुल गर्ने समस्या छ । त्यसैगरी उनकी श्रीमती भागादेवीको पनि दायाँ खुुट्टा चल्दैन । त्यसैगरी दुवै छोरा न्यूनदृष्टिका हुन् ।
जिल्लाको दुर्गम देउलीकोटबाट परिवार नै जिल्ला प्रशासन कार्यालयबाट आर्थिक संकलन गर्ने प्रमाण बनाउन आएका थिए । आफ्ना दुई छोरासहित सदरमुकाम चैनपुर आर्थिक सहयोग माग्दै आएका नरिले भने, ‘घरमा काम गर्ने कोही छैन, सबैमा अपांगता छ, छोराछोरी पढाउन खान लाउन समस्या छ त्यसैले बजारमा माग्दै छु ।’
बाठपाली माविमा अध्ययन गर्दै आएका छोराहरूलाई आर्थिक अभावका कारण विद्यालय छुटाउनुपर्ने अवस्था आएको उनको भनाइ थियो । बोहराको परिवारमा चारै जनासँग अपांगता परिचयपत्र छ । कान्छो छोरा नवीनको (क) श्रेणीको अपांगता परिचयपत्र भएकाले सरकारले मासिक दुई हजार रुपैयाँ दिने गरेकाले त्यसैबाट घर खर्च चलाउँदै आएको बोहराले बताए । घरका अन्य तीन जनासँग (घ) श्रेणीको परिचयपत्र भएकाले राज्यबाट पाउनुपर्ने सुविधाबाट उनीहरू वञ्चित छन् । आफूहरूले पनि राहत पाउनुपर्ने उनीहरूको माग छ ।
घरमूली नरिको एक्कासि खुट्टामा घाउ भएर उपचार गर्न नपाएर अपांगता भएको हो भने उनकी श्रीमतीको जन्मजात एउटा खुट्टा चल्न नसक्ने थियो । त्यसैगरी बोहराका दुवै छोरा जन्मजात न्यूनदृष्टिका हुन् । जेठो छोरा रवीन्द्रको धनगढीमा उपचार गरेर ल्याएपछि सामान्य हिँडडुल गर्न सक्छन् भने कान्छो छोरा नवीनले अरूकै सहारा लिनुपर्छ । –रासस
प्रकाशित मिति: शनिबार, चैत २३, २०७५
