इटहरी : सुनसरीमा प्रहरी स्थानीयबीच झडप हुँदा प्रहरीले गोली चलाएको छ । सुनसरीको भोक्राहास्थित भारतीय सीमा नाकामा गोली प्रहार हुँदा शुक्रबार साँझ दुई जना घाइते भएका छन् ।
सुनसरीका एसपी राजन अधिकारीका अनुसार सीमा नाकामा भारतबाट ल्याइएको सामान चेकजाँचमा विवाद भएपछि झडप भएको हो । झडपमा प्रहरीले एक राउण्ड गोली प्रहार गरेका थिए ।
भोक्राह सीमा नाकामा प्रहरी इन्चार्ज चन्द्रकुमार शाक्यमाथि हातपात भएको र उनी घाइते भएका छन् । प्रहरीमाथि हातपात भएपछि प्रहरीले गोली प्रहार गर्दा स्थानीय ज्याउल अन्सारी घाइते भएका छन् । एसपी अधिकारीका अनुसार दुवै घाइतेको उपचार गर्न धरानस्थित बीपी कोइराला स्वास्थ्य विज्ञान प्रतिष्ठानमा पठाइएको छ ।
भारतको विहारमा चुनावी माहोल चलिरहेकाले त्यसलाई पनि मध्यनजर गर्दै सीमा नाकामा कडाइ गरिएको बेला स्थानीय र प्रहरीबीच झडप भएको हो । स्थानीय बासिन्दाले आफूहरुमाथि प्रहरीले ज्यादती गरेको आरोप लगाएका छन् भने प्रहरीले स्थानीय बासिन्दाले पेस्तोल खोसेको आरोप लगाएको छ ।
सर्वसाधारण किसानले ल्याएको मलखाद रोक्दै असूली गर्न खोज्दा पैसा नदिएपछि प्रहरीले गोली चलाएको स्थानीयले आरोप लगाएका छन् । सीमा सुरक्षाका लागि बसेका प्रहरीले नजराना असूली गरेको र व्यापारी, तस्करबाहेक सर्वसाधारणसँग समेत असूली गर्ने क्रममा आक्रोशित स्थानीयले नाराबाजी गरेकाले प्रहरीले गोली चलाएको हो ।
स्थानीयका अनुसार सुनसरीको हरिनगर गाउँपालिकास्थित भुटाहा प्रहरी चौकीका प्रहरी नायब निरीक्षक चन्द्र शाक्यले नरसिंहको घिर्नी पुलमा मलखाद रोकेर पैसा माग्दा नदिएपछि विवाद बढेर भिड जम्मा हुँदा प्रहरीले गोली चलाएको स्थानीयले दाबी गरेका छन् ।
घटनालाई साम्य बनाउन हरिनगर १ का वडाध्यक्ष अबदुल लतिफ, नेता इसराइल मन्सुरी, हसबुल मियाँ र भोक्राहा नरसिंह ८ का वडा अध्यक्ष हातिम अन्सारी र प्रहरीबीचमा छलफल भएको थियो ।
प्रकाशित मिति: शुक्रबार, चैत २२, २०७५
