काठमाडौं : बारा र पर्सामा आइतबार रातिको हावाहुरीबाट मृत्यु भएका परिवारलाई तत्काल तीन लाख रुपैया उपलब्ध गराउने भएको छ। यस्तै सरकारले घाइते भएकाहरुको निःशुल्क उपचार गर्ने निर्णय पनि गरेको छ ।
बैठकको निर्णयबारे जानकारी दिँदै मुख्यमन्त्री लालबाबु राउतले भने, हामीले प्रत्येक मृतकलाई तीन लाखका दरले तत्कालीन राहत दिने भएका छौँ उपचारमा जति खर्च हुन्छ, त्यो प्रदेश सरकारले व्यहोर्ने छ ।
हावाहुण्डरीबाट बारा, पर्सा लगायतका जिल्लामा भएको ठूलो धनजनको क्षतिप्रति प्रदेश २ को मन्त्रिपरिषदले गहिरो दुःख प्रकट गरेको छ । हावाहुरीले घरका छानाहरू उडाएको र रूखहरू ढलेका कारण सयौ जनाभन्दा बढी घाइते भएको जनाइएको छ । वीगरगञ्जको नारायणी अस्पतालमा मात्र २ सय जना भन्दा बढीको उपचार भइरहेको छ । वीरगञ्जका अन्य अस्पतालमा पनि घाइतेहरूको उपचार भइरहेको जनाइएको छ ।
आइतबार राति भएको हावाहुरीका कारण मृत्यु हुनेको संख्या ३२ पुगेको छ भने ५०० भन्दा बढी घाइते भएका छन्। सोमबार बिहान प्रदेश सरकारको आकस्मिक बैठकले घटनाप्रति गहिरो शोक प्रकट गर्दै मृतकका परिवारलाई तत्कालीन रुपमा तीन लाखका दरले राहत उपलब्ध गराउने निर्णय गरेको छ।
उपचारका क्रममा थप केही घाइतेको समेत मृत्यु भएको छ। सुरक्षाकर्मी र स्थानीय उद्धारकर्मीहरु रातिदेखि अहिलेसम्म उद्धारमा खटिइरहेका छन्। प्राकृतिक विपत्तिमा परेर घाइते भएकाहरूको उपचार खर्च प्रदेश सरकारले व्यहोर्ने र घरबार गुमेकाहरुको बासस्थानका लागि पहल गर्ने निर्णय गरेको छ।
प्रकाशित मिति: सोमबार, चैत १८, २०७५
