काठमाडौं : काठमाडौँ महानगरपालिकाले आगामी वैशाखदेखि नयाँ सडक (न्युराेड) आसपासका पाँच स्थानमा ‘स्मार्ट पार्किङ’ लागू गर्ने भएको छ । महानगरले ह्विल्स ट्रलियोर्स प्रालिसँगको सहकार्यमा यो सेवा सुरु गर्न लागेको हो ।
सवारीको अत्यधिक चाप व्यवस्थापन हुन नसक्दा सो क्षेत्रमा समस्या भएपछि यस किसिमको व्यवस्था गर्न लागिएको हो । वैशाखदेखि नयाँ सडकको रामेश्वर मिठाई पछाडिको भाग, विशाल बजार अगाडि इन्द्रचोक जाने सडक, धर्मपथ, पाको र आरबी कम्प्लेक्स अगाडिको स्थानमा स्मार्ट पार्किङ सुरु हुने छ । ती स्थानमा एक पटकमा करिब आठ सय मोटरसाइकल र ४० वटा गाडी पार्किङ गर्न सकिन्छ ।
प्रालिका सूचना प्रविधि इञ्जिनीयर हरिश अग्रवालका अनुसार ती ठाउँमा स्मार्ट अटोमेटेड पार्किङ प्रणाली सुरु हुने छ । नयाँ सडक जानुअघि उपभोक्ताले मोबाइलबाटै कुन ठाउँ खाली छ भनेर हेर्न र पार्किङ गर्ने ठाउँ सुनिश्चित गर्न सक्छन् ।
त्यस ठाउँको व्यवस्थापनका लागि ‘गोप्रो’ क्यामरासहितका पार्किङ सहयोगी राखिने छन् । उनीहरुसँग भएको क्यामराले त्यस क्षेत्रमा भएका गतिविधि आवाजसहित अभिलेख गरेर राख्छन् । ती क्षेत्रमा पार्किङ गर्दा दुई पाङ्गे सवारीकालागि प्रतिघण्टा कर बाहेक २०, चार पाङ्ग्रेका लागि प्रतिघण्टा ५० र छ पाङ्ग्रे वा सोभन्दा माथिका लागि प्रतिघण्टा दुई सय रुपैयाँ शुल्क लाग्ने छ ।
यसरी सङ्कलन गरिएको रकमबाट सञ्चालकले महानगरलाई राजश्व बुझाउने छन् । काठमाडौँमा भएका सवारी साधनमध्ये औसतमा १० प्रतिशत समय मात्र सडकमा गुड्छन् । बाँकी समय पार्किङ गरिएका हुन्छन् । त्यसैले पार्किङको समस्या बढेको हो । -रासस
प्रकाशित मिति: बिहीबार, चैत १४, २०७५
