काठमाडौं : महानगरीय प्रहरी त्रिभुवन अन्तर्राष्ट्रिय विमानस्थल कार्यालयले अवैध रूपमा सुन विदेश लैजाने क्रममा ४ जनालाई पक्राउ गरेको छ ।
कार्यालयले विदेश लैजानका लागि अन्तर्राष्ट्रिय उडानतर्फको पार्किङ क्षेत्रबाट चितवनका सुनिल राउत, बाराका सन्दीप पटेल, मकवानपुरका अर्पण केसी र खोटाङका मनोज राईलाई सोमबार साँझ पक्राउ गरेको हो ।
प्रहरीले पक्राउ परेकामध्ये राउत र पटेलसँग १० लाख १५ हजार मूल्य पर्ने ४ थान सुनको ठूलो बाला, केसी र राईसँग १७ लाख ४६ हजार मूल्य बराबरको ५ थान सुनको ठूलो बाला, ३ मोबाइल र ल्यापटप बरामद गरेको छ ।
पक्राउ परेका चारै जनालाई सुन र सामानसहित आवश्यक कारबाहीका लागि त्रिभुवन विमानस्थल भन्सार कार्यालय पठाइएको प्रहरीले जनाएको छ ।
प्रकाशित मिति: मंगलबार, चैत ५, २०७५
