कपिलवस्तु : २०७६ वैशाख २७ र २८ गते भगवान गौतम बुद्धको जन्मस्थल लुम्बिनीमा अवधी भाषा, साहित्य तथा संस्कृतिसम्बन्धी दुई दिने बृहत् ‘राष्ट्रिय अवधी सम्मेलन’ सम्पन्न भएको छ ।
नेपाल प्रज्ञाप्रतिष्ठान, सामाजिक विकास मन्त्रालय प्रदेश ५ र अवधी सांस्कृतिक विकास परिषद्सँगको सहकार्यमा कपिलवस्तुस्थित शिक्षा तथा संस्कृति प्रवर्द्धन केन्द्र, नेपालले आयोजना गरेको सम्मेलनमा अवधी भाषा, साहित्य, कला तथा संस्कृतिसम्बन्धी छवटा कार्यपत्र प्रस्तुतिका साथै त्यसमाथि विमर्शसमेत गरिएको थियो ।
सम्मेलनमा प्रज्ञाप्रतिष्ठान, मातृभाषा विभाग प्रमुख प्रा.डा. योगेन्द्रप्रसाद यादव, अनुवाद विभाग प्रमुख प्रा.डा. उषा ठाकुर, मातृभाषा साहित्य विभाग प्रमुख लक्ष्मी माली र बालसाहित्य तथा लोकवार्ता विभाग प्रमुख डा. देवी नेपालको उपस्थिति रहेको थियो भने भारतका विभिन्न क्षेत्रका विद्वानहरू सहभागी थिए । कार्यक्रममा प्राज्ञहरूले प्रज्ञाप्रतिष्ठानले गरिरहेका कार्य तथा भावी योजनाबारे प्रकाश पारेका थिए ।
प्रदेश ५ का सामाजिक विकासमन्त्री सुदर्शन बरालद्वारा उद्घाटन गरिएको सम्मेलनमा ‘विश्व परिदृश्यमा अवधी भाषाको अवस्था’ विषयमा विक्रममणि त्रिपाठी, ‘विश्व परिदृश्यमा अवधी साहित्यको अवस्था’बारे डा. रामबहादुर मिश्र, ‘अवधी भाषामा अनुवाद साहित्यको अवस्था’ सम्बन्धी प्रा.डा. सूर्यप्रसाद दीक्षित र सनत रेग्मी, अवधीभाषी समाजको लोककलाको दशा र दिशा विषयमा यस.सी. सुमन, अवधीभाषी समाजको लोकसाहित्यको अवस्था का बारेमा पशुपतिमणि त्रिपाठी र राघवेन्द्रकुमार श्रीवास्तव र अवधीभाषी समाजको लोकनृत्य परम्परा सम्बन्धी जगतराम यादवले कार्यपत्र प्रस्तुत गरेका थिए ।