काठमाडाैं । चैत ११ गतेदेखि बन्द रहेका लामाे दूरीका सार्वजनिक यातायात र आन्तरिक हवाई उडान असाेज १ गते बिहीबारबाट सञ्चालन हुने भएका छन् ।
सोमबार बसेको मन्त्रिपरिषद् बैठकले सो निर्णय गरेको परराष्ट्रमन्त्री तथा सरकारका प्रवक्ता प्रदीप ज्ञवालीले जानकारी दिए ।
सरकारले शर्तसहित लामो दूरीको यातायात खुलाउने निर्णय गरेको उनले बताए । उनका अनुसार सरकारले ५० प्रतिशत सिट क्षमतामा मात्रै यात्रु राख्ने पाइने, भौतिक दूरी कायम हुने गरी एक पंक्तिको एउटा सिटमा १ जना मात्र राख्न पाइने, सबै यात्रुले मास्क अनिवार्य लगाउनुपर्ने, यात्रु चढ्ने बेलामा बसको ढोकामा र भित्र सेनिटाइजर राख्नुपर्ने, चालक र सहचालकले मास्क, पञ्जा र भाइजर अनिवार्य प्रयाेग गर्नुपर्ने शर्त राखिएकाे छ।
व्यवसायीले साविकको भाडादरमा ५० प्रतिशत बढाएर लिन सक्ने निर्णय गरेकाे पनि ज्ञवालीले जानकारी दिए ।
यससम्बन्धी थप मापदण्ड भौतिक पूर्वाधार तथा यातायात मन्त्रालयले बनाउने मन्त्री ज्ञवालीले जानकारी दिए।
यसैगरी सरकारले आन्तरिक हवाई उडान र होटल रेस्टुरेन्टहरु पनि असोज १ गतेबाटै खुला गर्ने भएको छ ।
बैठकले स्वास्थ्य सुरक्षाको मापदण्ड पालना गर्दै अन्तरिक हवाई उडान सुरु गर्ने निर्णय गरेको हो । विमानमा सिट क्षमताको आधा मात्र यात्रु राख्नुपर्ने छ भने मास्क, भाइजर र सेनिटाइजर अनिवार्य गरिएको छ ।
यसैगरी आउँदो कात्तिक १ गतेदेखि हिमाल आरोहण पनि खुला गर्ने निर्णय भएकाे छ । त्यसका लागि बढीमा ७२ घण्टाअघिकाे पिसिआर रिपोर्ट नेगेटिभ भएको हुनुपर्ने छ भने स्वास्थ्य सुरक्षाका सबै मापदण्ड अनिवार्य पालना गर्नु पर्ने छ ।
यसैगरी अहिलेसम्म ‘टेक अवे’ सेवा मात्र लिन पाउने व्यवस्था गरेर हाेटल रेस्टुरेन्ट सञ्चालन गर्न दिएकामा १ गतेदेखि भने स्वास्थ्य मापदण्ड अपनाएर सञ्चालन गर्न दिने निर्णय गरेकाे छ ।
ज्ञवालीका अनुसार होटल तथा ट्रेकिङ व्यवसायहरुले स्वास्थ्य सुरक्षाका मापदण्डहरु पालना गरे नगरेको अनुगमन संस्कृति, पर्यटक तथा नागरिक उड्डयन मन्त्रालयले गर्ने छ ।
प्रकाशित मिति: मंगलबार, भदौ ३०, २०७७
