काठमाडौं । सत्तारुढ नेकपाका उपाध्यक्ष वामदेव गौतमले भारतले अतिक्रमण गरेको भूमि समेटेर नयाँ नक्सा सार्वजनिक गर्ने निर्णय पार्टीको सामूहिक प्रयासबाट सम्भव भएको बताएका छन् ।
बुधबार एक प्रेस नोट सार्वजनिक गर्दै उपाध्यक्ष गौतमले पार्टी निर्णय अनुसार भएको कामलाई लिएर निश्चित व्यक्तिको देवत्वकरण नगर्न समेत आग्रह गरेका छन् ।
'अनुयायीहरु व्यक्ति केन्द्रित हुन्छन् र निश्चित व्यक्तिका नामलाई देवत्वकरण गर्न व्यस्त हुने प्रचलन छ', गौतमले भनेका छन्,'तर, यो निर्णय पार्टीको सामूहिक निर्णयप्रक्रिया अनुसार भएर, नेपाल सरकारबाट पनि त्यहीअनुरुप अनुमोदन भएको वास्तविकतालाई सबैले स्वीकार गर्नुपर्छ ।'
नेपालका अतिक्रमित भूमिलाई समेटेर नक्सा जारी गर्नुपर्ने प्रस्ताव पार्टी बैठकमा आफूले नै लगेको गौतमले दाबी गरेका छन् । ‘सुरुदेखि नै पार्टीमा सशक्त विचार र जोडदार माग राख्दै आएको म सबैमा स्मरण गराउन चाहन्छु । यसपटक पनि छुटेका नेपाली भू–भाग समेटेर नक्सा जारी गर्नुपर्ने प्रस्ताव पार्टीको बैठकमा मैले नै राखेको यहाँहरु सबैमा जानकारी गराउँछु’, उनले लेखेका छन् ।
प्रकाशित मिति: बुधबार, ७ जेठ २०७७
