काठमाडाैं । प्रतिनिधिसभा सदस्य, प्रदेशसभा सदस्य र स्थानीय तहको ५२ पदका लागि शनिबार भएको उपनिर्वाचनको सबै नतिजा सार्वजनिक भएको छ ।
निर्वाचन आयोगका अनुसार उपनिर्वाचनमा नेपाल कम्युनिस्ट पार्टी (नेकपा) ले ३० स्थानमा विजय हासिल गरेको छ भने प्रमुख प्रतिपक्ष दल नेपाली कांग्रेसले १३ स्थानमा जितेको छ ।
यसैगरी समाजवादी पार्टी नेपालले ४ र राष्ट्रिय जनता पार्टी (राजपा) ले ३ स्थानमा विजयी हासिल गरेकाे छ भने १ स्वतन्त्र उम्मेदवारले पनि उपनिर्वाचनमा बाजी मार्न सफल भएका छन् ।
नेकपाले १ प्रतिनिधिसभा सदस्य, १ प्रदेशसभा सदस्य, १ गाउँपालिका अध्यक्ष, १ उपाध्यक्ष र २४ वडाध्यक्ष पद जितेको छ भने कांग्रेसले प्रदेशसभा सदस्य १, उपमहानगर प्रमुख १ र ११ वडाध्यक्ष पदमा विजय हासिल गरेको हो ।
समाजवादीका उम्मेदवारले ४ र राष्ट्रिय जनता पार्टीका उम्मेदवारले ३ वडाध्यक्ष पदको नतिजा आफनो पक्षमा पार्न सफल भए । नेकपाको सहयोगमा राष्ट्रिय जनमोर्चाले बागलुङमा प्रदेशसभा सदस्य १ पद जितेको छ भने १ जना स्वतन्त्र उम्मेदवार प्यूठानमा वडाध्यक्षमा विजयी भएका हुन् ।
प्रतिनिधिसभा, प्रदेशसभा र स्थानीय तहको उपनिर्वाचनको मतपरिणाम सार्वजनिक भएसँगै विभिन्न कारणले रिक्त भएका ५२ पदमा अब नयाँ जनप्रतिनिधिको प्रवेश भएको छ । सिट सङ्ख्याका आधारमा उपनिर्वाचनको परिणामले राष्ट्रिय राजनीतिमा खासै असर नगरे पनि जनप्रतिनिधि छनोटको आधारमा भने केही फेरबदल भएको छ ।
अघिल्लो निर्वाचनजस्तै धेरै क्षेत्रमा पुरानै दलका प्रतिनिधि चयन भए पनि कतिपय स्थानमा भने १ दलका उम्मेदवारले अर्कोलाई विस्थापित गरेका छन् । प्रतिनिधिसभा कास्की क्षेत्र नम्बर २ मा नेकपाले जित दोहोर्याएको छ भने कांग्रेसले प्रदेशसभामा भक्तपुरबाट सिट सङ्ख्या बढाएको छ ।
बागलुङको प्रदेशसभा सदस्यमा नेकपा समर्थित राष्ट्रिय जनमोर्चाले जितेको छ भने स्थानीय तहतर्फ सुनसरीको धरान उपमहानगरपालिका प्रमुख जितेर कांग्रेसले प्रमुखको सङ्ख्या बढाएको छ । नेकपाले प्रतिनिधिसभासहित दाङको प्रदेशसभा र उपनिर्वाचन भएका ३ वटै गाउँपालिका अध्यक्ष तथा उपाध्यक्ष जितेको छ । उपनिर्वाचनबाट ७ महिला, ७ मधेसी, १८ आदिवासी जनजाति र १ अल्पसङ्ख्यकको चयन भएको छ । रासस
हेर्नुहाेस् सूचीः
प्रकाशित मिति: सोमबार, मंसिर १६, २०७६ ०९:०३