मध्य इन्डोनेसियाको एक सुन खानीमा भएको दुर्घटनामा मृत्यु हुनेहरूको संख्या २७ पुगेको राष्ट्रिय विपद् एजेन्सीले जनाएको छ ।
एजेन्सीका अधिकारीहरूले अरू व्यक्तिको खोज तथा उद्धारको कार्य अन्त्य भएको पनि जनाएका छन् । उद्धारकर्मीलाई सुन खानीको भित्री भागमा पुगेर खोज तथा उद्धारका कार्य गर्न कठिनाइ भएपछि उद्धार कार्य स्थगित गरिएको हो ।
बोलाङ मन्गोन्डो जिल्लाका विपद् व्यवस्थापन एजेन्सीका प्रमुख ह्यारिस डिलापाङ्गाले सुन खानीभित्र कति मजदुर थिए भन्ने अझै टुङ्गो नलागेको जानकारी दिए ।
बिना अनुमति सञ्चालित उक्त सुन खानीमा गत फेब्रुअरी २६ मा दुर्घटना भएको थियो । उक्त खानीबाट १८ जना मजदुरलाई भने उद्धार गरिएको र उनीहरू विभिन्न चोटपटकबाट सख्त घाइते भएका जनाइएको छ ।
एजेन्सीका अनुसार खानीको कमजोर पूर्वाधार तथा कमजोर भूबनोटभित्र लामालामा सुरुङ खनिएका कारण इन्डोनेसियामा बारम्बार खानी दुर्घटना हुने गरेका छन् ।
इन्डोनेसिया सरकारले अवैधानिक सुन खानीमाथि प्रतिबन्ध लगाएको छ तर देशका दुर्गम स्थानहरूमा सुन खानी निर्वाध रूपमा सञ्चालन हुने गरेका छन् ।
-1732776560.jpg)
