कायरो ः इजिप्टको राजधानी कायरोमा बुधबार रेल दुर्घटनापछि आगलागी हुँदा कम्तीमा २० जनाको मृत्यु भएको त्यहाँका अधिकारीले जनाएका छन् ।
राजधानी कायरोस्थित रेल स्टेसननजिकै रेल दुर्घटना भएको छ साथै रेलको इन्धन ट्याङ्की विस्फोट भई आगलागी हुँदा २० जनाको मृत्यु भएको र केही यात्रु आगोले जलेर घाइते भएका कारण मृतक सङ्ख्या थप बढ्न सक्ने कायरो रेलमार्गस्थित एक अस्पतालका प्रमुख मोहम्मद सैयदलाई उद्धृत गरी कतारी सञ्चारमाध्यम अलजजिराले जनाएको छ ।
प्रारम्भिक जानकारीअनुसार तीव्र गतिमा रहेको रेल अचानक दुर्घटनाग्रस्त हुँदा इन्धन ट्याङ्कीमा आगलागीपछि विस्फोट भएको थियो ।
दुर्घटनामा घाइते करिब ४० जनाको स्थानीय अस्पतालमा उपचार भइरहेको छ । यसैबीच इजिप्टका यातायातमन्त्रीले राजधानीको केन्द्रीय रेल स्टेसननजिकै भएको दुर्घटनालाई लिएर राजीनामा दिएका त्यहाँको मन्त्रिपरिषद्ले जनाएको छ ।
‘यातायातमन्त्री हिसाम अराफातले रेल दुर्घटनापछि आफ्नो राजीनामा दिएका छन् भने प्रधानमन्त्रीले उनको राजीनामा स्वीकृत गरेका छन्,’ मन्त्रिपरिषद्वारा जारी विज्ञप्तिमा जनाइएको छ ।
प्रकाशित मिति: बिहीबार, फागुन १६, २०७५
-1732776560.jpg)
