भारतीय वायुसेनाको विमानले पाकिस्तानमा बम खसालेको छ ।
विमानले भारत-पाकिस्तान नियन्त्रण रेखा (एलओसी) पास गर्दै नियन्त्रण रेखा नजिकैको बालाकोट क्षेत्रमा बम खसालेको हो ।
यसअघि पाकिस्तानी सेनाले भारतीय वायुसेनाले भारत-पाकिस्तान नियन्त्रण रेखा (एलओसी) उल्लंघन गरेर पाकिस्तानी सेनामा घुसपैठ गर्न खोजेको आरोप लगाएको थियो ।
पाकिस्तानी सेनाका प्रवक्ता मेजर जनरल असिफ घाफुरले ट्विटमा भनेका छन्, ‘भारतीय विमानले मुजफ्फराबाद सेक्टरमा घुसपैठ गर्यो । जवाफमा पाकिस्तानी सेनाले तुरुन्त कारवाही गरेपछि विमान भाग्यो । भाग्ने क्रममा उसले हड्बडाएर केही बमहरू खसाल्यो, जुन बालाकोट नजिक खसे । यसमा कुनै मानवीय वा भौतिक क्षति भएन ।’
भारतीय मिडियाले भने वायुसेनाको हवाला दिँदै भारतका लडाकु विमानले बिहान ३:३० बजे बालाकोट नजिक रहेको जैस ए मोहम्मदको एक सिविरमा हमला गरेर ध्वस्त पारेको दाबी गरेका छन् । भारतले यसबारे केही बोलेको छैन ।
विपक्षी कांग्रेस आईका अध्यक्ष राहुल गान्धीले भने वायुसेनालाई बधाई दिएका छन् । उनले ट्विटमा भनेका छन्, ‘म भारतीय वायुसेनाका पाइलटहरूलाई सलाम गर्छु ।’
गत १४ फेब्रुअरीमा भारत प्रशासित काश्मिरको पलुवामामा आतंकवादी समूहको आक्रमणबाट ४६ भारतीय सैनिक मारिएका थिए । उक्त आतंकवादी समूहलाई पाकिस्तानले संरक्षण दिएको आरोप भारतले लगाइरहेको छ ।
प्रकाशित मिति: मंगलबार, फागुन १४, २०७५
-1732776560.jpg)
