आसाम ः भारतको पूर्वी–उत्तर राज्य आसाममा विषाक्त मदिरा सेवनका कारण मृत्यु हुनेको सङ्ख्या १०० भन्दा बढी पुगेको अधिकारीहरूले बताएका छन् ।
२ सयभन्दा बढी व्यक्तिलाई उपचारका लागि एउटा अस्पतालमा भर्ना गरिएको छ । बिरामीमध्ये महिलाहरू पनि रहेका छन् । उनीहरू सबै आसामको चिया बगानमा काम गर्ने मजदुर हुन् ।
स्थानीय सञ्चारमाध्यममा प्रकाशित विवरणअनुसार मृत्यु हुनेहरूको सङ्ख्या अझै बढ्न सक्ने बताइएको छ । गोलाघाट जिल्लामा मात्रै ५८ जनाको मृत्यु भएको प्रहरी अधिकारी पुष्कर सिंहले बताए ।
अर्को स्रोतका अनुसार १२ जनाको मृत्यु जोरहाट जिल्लामा भएको छ ।
गोलाघाट स्वास्थ्य विभागका सहनिर्देशक डा. रतुल बोरदोलोईका अनुसार पीडितहरू बान्ता गर्दै र छाती दुख्ने एवं सास फेर्न गाह्रो हुने गम्भीर समस्यासहित अस्पताल पुगेका थिए । अधिकारीहरूका अनुसार सो घटनाको छानबिन गर्न एउटा समिति बनाइएको छ ।
राज्य प्रहरीका अनुसार उनीहरूले एक जनालाई अवैध मदिरा बेचेको आरोपमा समातेको छ ।
त्यस्तो मदिरा बिक्रीवितरण रोक्न नसकेको भन्दै दुई जना अधिकारीलाई पनि निलम्बन गरिएको जनाइएको छ ।
प्रकाशित मिति: आइतबार, फागुन १२, २०७५
-1732776560.jpg)
