काठमाडौं । गृहमन्त्री ओमप्रकाश अर्याल र नेपालका लागि भारतीय राजदूत नवीन श्रीवास्तवबीच आइतबार गृह मन्त्रालयमा करिब ४५ मिनेट लामो भेटवार्ता सम्पन्न भयो। बैठकमा आगामी २१ फागुनमा हुने प्रतिनिधि सभा निर्वाचन, शान्ति–सुरक्षा तथा दुई देशबीचको समन्वयका विषयमा छलफल भएको मन्त्रालयले जनाएको छ।
तर, मन्त्रालयका उच्च स्रोतका अनुसार छलफलको एउटा प्रमुख विषय दुर्गा प्रसाईंको भारत भ्रमण पनि रहेको थियो।
‘राष्ट्र, राष्ट्रियता, धर्म, संस्कृति र नागरिक बचाऔं महाअभियान’ का संयोजक प्रसाईं गत सोमबार नेपाल एअरलायन्सको उडानमार्फत नयाँदिल्ली गएका थिए। उनले करिब पाँच दिन भारतमा बिताएपछि शुक्रबार काठमाडौं फर्किएका हुन्। प्रसाईंको भ्रमणको उद्देश्य र त्यहाँका गतिविधिबारे गृह मन्त्रालयले भारतीय राजदूतसँग जानकारी मागेको स्रोतले बतायो।
जवाफमा राजदूत श्रीवास्तवले भारतमा प्रसाईंले कुनै पनि राजनीतिक भेटघाट नगरेको जानकारी दिएका थिए।
हाल प्रसाईं नेपाली सुरक्षा निकायको निगरानीमा छन्। उनी ७ मंसिरमा देशव्यापी आन्दोलनको तयारीमा रहेको र भारत भ्रमण त्यसको पूर्वसन्ध्यामा परेको हुँदा गृह मन्त्रालयले त्यसलाई विशेष रूपमा नियालेको थियो।
नेपाल फर्कने क्रममा दिल्ली विमानस्थलमा भारतीय अध्यागमनले प्रसाईंलाई आधा घण्टा भन्दा बढी समय सोधपुछ गरेको थियो। भारतीय अधिकारीहरूले उनलाई भारतमा राजनीतिक गतिविधि नगर्न र भारतको समर्थन रहेको भन्ने भ्रामक दाबी नगर्न चेतावनी दिएको एनडीटीभीले जनाएको छ।
स्रोतका अनुसार प्रसाईंले भारतमा आफू रहने भनेर बताएको स्थानमा नबसी ठाउँ–ठाउँ सरेपछि उनी निगरानीमा परेका थिए। निर्धारित भन्दा बढी समय भारतमा बिताएको कारण पनि भारतीय पक्षले उनको गतिविधिप्रति चासो देखाएको बताइन्छ।
गृहमन्त्री अर्याल र राजदूत श्रीवास्तवबीचको भेटमा चुनावी सुरक्षाको तयारीबारे पनि छलफल भएको थियो। राजदूत श्रीवास्तवले नेपालमा हुने निर्वाचन शान्तिपूर्ण र भयरहित वातावरणमा सम्पन्न हुने विश्वास व्यक्त गरे।
मन्त्री अर्यालले सरकारको प्राथमिकता शान्ति–सुरक्षा, सुशासन र भ्रष्टाचारविरहित प्रशासनिक सेवा रहेको बताउँदै, खुला सीमा व्यवस्थापनमा भारतको सहयोग अपेक्षित रहेको धारणा व्यक्त गरे।
यसैबीच, गृह मन्त्रालयले प्रसाईंलाई संवादको लागि २६ कात्तिकमा बोलाएको भए पनि उनले प्रधानमन्त्रीसँग मात्र वार्ता गर्ने बताएका छन्। प्रसाईंमाथि नेपाल र भारत दुवै देशको सुरक्षा संयन्त्रले उच्च सतर्कता अपनाइरहेका छन्।
प्रकाशित मिति: आइतबार, कात्तिक २४, २०८२
