काठमाडौं । प्रधानमन्त्री सुशीला कार्कीले देशमा बढ्दै गएको घुसखोरी, पार्टीगत लेवी र कमिसनको जालोप्रति कडा असन्तुष्टि जनाउँदै अब यस्तो प्रवृत्ति कुनै हालतमा सह्य नहुने चेतावनी दिएकी छन्।
राष्ट्रिय आर्थिक बहस २.० मा निजी क्षेत्रका प्रतिनिधिहरूसँग बोल्दै उनले लोकतन्त्रको नाममा लुटतन्त्र चल्ने अवस्था अब समाप्त हुनुपर्ने स्पष्ट सन्देश दिइन्। प्रधानमन्त्री कार्कीले इमानदार उद्यमीहरूलाई दुःख दिने र नीतिगत चलखेलमार्फत अनुचित लाभ उठाउने समूहहरूलाई अब सरकारद्वारा संरक्षण नपाउने बताइन्।
उनले भनिन्, “जेनजी आन्दोलनको पृष्ठभूमिमा केही उच्छृङ्खल समूहहरूले राज्यविहीनताको फाइदा उठाउँदै उद्योग र व्यापारिक क्षेत्रमा पुर्याएको क्षति अस्वीकार्य छ। ती घटनाबाट मर्माहत भएका निजी क्षेत्रका उद्यमीलाई जस्तै, आन्दोलनमा घाइते युवाहरूलाई पनि राहत र सहयोग पुर्याउन सरकार पूर्ण रूपमा प्रतिबद्ध छ।”
प्रधानमन्त्री कार्कीले मुलुकलाई दिगो लोकतान्त्रिक अभ्यासमार्फत अगाडि बढाउँदै “यहाँ नै इमानदारीपूर्वक गरिखान सकिने वातावरण” निर्माण गर्ने आफ्नो लक्ष्य दोहोर्याइन्।
प्रकाशित मिति: शनिबार, कात्तिक २३, २०८२
