काठमाडौं । मधेश प्रदेशका मुख्यमन्त्री जितेन्द्र सोनलले आज आफ्नो पदबाट राजीनामा दिएका छन् । प्रदेश प्रमुख सुमित्रा सुवेदी भण्डारीले उनको राजीनामा स्वीकृत गरेकी छन् ।
मुख्यमन्त्री सोनलले आज प्रदेश सभामा विश्वासको मतका लागि समय लिएका थिए । तर आवश्यक मत नपाउने अवस्था देखिएपछि उनले सदनमै राजीनामा घोषणा गरे र त्यसपछि औपचारिक रूपमा प्रदेश प्रमुख सुवेदीसमक्ष राजीनामा पत्र बुझाए ।
लोकतान्त्रिक समाजवादी पार्टी (लोसपा)का नेता सोनललाई गत २९ असोजमा प्रदेश प्रमुखले मुख्यमन्त्रीमा नियुक्त गरेकी थिइन् । मधेश प्रदेश सभामा कुल १०७ सदस्य छन् र सरकार बनाउन ५४ मतको बहुमत आवश्यक हुन्छ ।
सत्तारूढ गठबन्धनमा लोसपाका ८, जसपा नेपालको १८, जनमतका १३, माओवादी केन्द्रका ९ र एकीकृत समाजवादीका ७ सांसद छन् । नागरिक उन्मुक्ति पार्टीले सोनललाई समर्थन गर्ने निर्णय गरे पनि संघीय समाजवादी पार्टीकी सांसद बिमला अन्सारी आजको मतदानमा अनुपस्थित रहिन् ।
त्यसैगरी, माओवादी केन्द्रका प्रदेश सांसद रहबर अन्सारी र माला राईले सदनमै पार्टी निर्णयको विरुद्धमा विद्रोह गरेका थिए । जनमत पार्टीका नेता सतिशकुमार सिंह र त्रिभुवन शाह पनि बैठकमा उपस्थित थिएनन् ।
विश्वासको मत नपाउने अवस्था स्पष्ट भएपछि सोनलले पदबाट राजीनामा दिए र प्रदेश प्रमुखले त्यसलाई स्वीकृत गरेकी हुन् ।
प्रकाशित मिति: शनिबार, कात्तिक २३, २०८२
