काठमाडौं । रुपन्देही-३ मा हुने प्रतिनिधि सभा उपचुनावका लागि काठमाडौं महानगरपालिकाका कानुनी सल्लाहकार ओमप्रकाश अर्याल उम्मेदवारी दिने तयारीमा छन्। कात्तिक १७ मा हुने निर्वाचनका लागि उनले समर्थक तथा शुभेच्छुकसँग परामर्श तीव्र पारेका छन्।
स्वतन्त्र रुपमा उठ्ने तयारीमा रहेका संवैधानिक कानुन व्यवसायी मञ्च अध्यक्ष अर्यालले राजनीतिक दलको टिकट नलिने बताएका छन्। सार्वजनिक सरोकारका मुद्दा, भ्रष्टाचारविरुद्धका रिट तथा अतिक्रमित सम्पत्ति संरक्षणमा सक्रिय उनी चिकित्सा शिक्षा सुधार आन्दोलनमा पनि संलग्न रहिसकेका छन्।
२०७९ मंसिरमा यस क्षेत्रबाट निर्वाचित राप्रपाका दीपक बोहराको निधनपछि रिक्त भएको सिटका लागि रास्वपा, कांग्रेस र एमाले उम्मेदवार टुंग्याउने तयारीमा छन्। राप्रपाले भने बोहराका छोरासहित ६ जनाको नाम केन्द्रमा पठाइसकेको छ।
प्रकाशित मिति: बिहीबार, साउन ३०, २०८२
