काठमाडौं । बागमती प्रदेशका निवर्तमान मुख्यमन्त्री बहादुरसिंह लामा पक्षका सांसदहरूले पूर्वसहमति कार्यान्वयनका विषयमा छलफल गर्न काठमाडौंमा बैठक बस्दैछन्।
लामाले नवनियुक्त मुख्यमन्त्री इन्द्रबहादुर बानियाँसँग राजीनामाअघि भएका सम्झौताहरू कार्यान्वयनको अवस्था स्पष्ट गर्न आफ्ना पक्षका सांसदहरूलाई दिउँसो २ बजे बैठकमा बोलाएका हुन्। बैठकपछि उनीहरू पार्टी सभापति शेरबहादुर देउवालाई पनि भेट्ने तयारीमा छन्।
लामा पक्षका एक सांसदका अनुसार, सहमति कार्यान्वयनको निश्चितता नभएसम्म बानियाँलाई विश्वासको मत नदिने अडान कायम राख्ने निर्णय बैठकको मुख्य एजेन्डा हो।
‘कांग्रेसको इतिहासमा पहिलोपटक संसदीय दलको नेताविरुद्ध अविश्वासको प्रस्ताव ल्याइयो,’ ती सांसदले भने, ‘आफ्नै सरकारलाई विश्वासको मत नदिने घटना पनि सम्भवतः पहिलोपटक हुनेछ।’
यसअघि कांग्रेसकै सांसदहरूले लामाविरुद्ध अविश्वासको प्रस्ताव दर्ता गरी दलको नेताबाट हटाएपछि, भएको निर्वाचनमा बानियाँ नेता निर्वाचित भएका थिए। देउवासँगको छलफलपछि लामाले राजीनामा दिएका थिए, जसमा राजीनामापछि नियुक्त मन्त्रीहरूलाई कायम राख्ने र मन्त्रिपरिषद् विस्तार गर्नेजस्ता सहमति भएका थिए।
प्रकाशित मिति: आइतबार, साउन २६, २०८२
