काठमाडौँ । नेपाल कम्युनिष्ट पार्टी (एकीकृत समाजवादी)ले मातहतका सबै कमिटीमा थप छलफलका लागि चार वटा दस्ताबेज पठाउने भएको छ। साथै ती दस्ताबेजमा सबै कमिटीबाट सुझाव प्राप्त भएपछि परिमार्जन गर्ने जनाएको छ।
राजनीतिक, विधान, समाजवादी कार्यक्रमसम्बन्धी र साङ्गठनिक दस्ताबेजमा सबै कमिटीबाट सुझाव सङ्कलन गरी साझा धारणा बनाउन लागेको नेकपा एसले जनाएको छ।
देशभरका सबै पालिका, वडा, टोल, जिल्ला, प्रदेश र केन्द्रसम्मको सुझाव समावेश गरी पूर्णता दिइने ती दस्ताबेज आगामी जेठ ९ गतेसम्ममा सबै कमिटीमा पठाउने नेकपा एसले जनाएको छ।
जेठ मसान्तभित्र दस्तावेजहरूमाथि सबै कमिटीले आफ्नो कार्यक्षेत्रमा पार्टी सङ्गठित सदस्यलाई सहभागी गराई परामर्श लिएपछि आसन्न १०औँ राष्ट्रिय महाधिवेशनमा एउटै दस्ताबेज बनाएर लैजाने तयारी गरिएको सचिव जीवनराम श्रेष्ठले जानकारी दिए।
पार्टी अध्यक्ष माधवकुमार नेपालले तयार पारेको राजनीतिक दस्ताबेजमा राष्ट्रिय एकता, सामाजिक, सांस्कृतिक पक्ष, समसामयिक विषयवस्तु उल्लेख गरिएका छन्।
पार्टीका सम्मानित नेता झलनाथ खनालले लेखेको समाजवादी कार्यक्रमसम्बन्धी दस्ताबेजमा समाजवादको स्वरुप, आर्थिक रुपान्तरणका साथै वैज्ञानिक समाजवादका विषय छन्।
प्रकाशित मिति: आइतबार, वैशाख ९, २०८१ ११:०१
