काठमाडौं । अर्जेन्टिनाका सर्वाधिक गोलकर्ता तथा पूर्वकप्तान लियोनल मेसीको सम्मानमा अर्जेन्टिनामा यस साता हुने हरेक फुटबल खेल एक मिनेटका लागि रोकिने भएको छ ।
अर्जेन्टिना फुटबल संघका अनुसार महिला र पुरुषतर्फ सबै डिभिजनका खेल पहिलो हाफमा सुरु भएको १० मिनेटपछि एक मिनेट रोकिँदैछ । उक्त समयमा खेलाडी, प्रशिक्षक तथा समर्थकले मेसीको सम्मानमा ताली बजाउनेछन् ।
संघले मेसीले अर्जेन्टिनाको राष्ट्रिय टोलीमा पुर्याएको योगदान र उनको अन्तर्राष्ट्रिय करिअरको सम्मानस्वरूप यस्तो निर्णय गरिएको जनाएको छ ।
मेसीले गत सोमबार सामाजिक सञ्जालमार्फत राष्ट्रिय टोलीबाट सन्यासको घोषणा गरेका थिए । उनले आफ्नो निर्णय निकै पीडादायी भए पनि अब समय आएको महसुस गरेको बताएका थिए ।
मेसीको कप्तानीमा अर्जेन्टिनाले सन् २०२२ को फिफा विश्वकप जितेको थियो । उनले २०२१ र २०२४ को कोपा अमेरिका उपाधि जित्दा पनि अर्जेन्टिनाको नेतृत्व गरेका थिए ।
यस्तै, मेसी आठपटक प्रतिष्ठित बलोन डे’ओर जित्ने खेलाडी हुन् । सन् २०२६ को फिफा विश्वकपमा पनि उनले अर्जेन्टिनालाई फाइनलसम्म पुर्याउन महत्वपूर्ण भूमिका खेलेका थिए । प्रतियोगितामा आठ गोल गरेका मेसीले आफ्नो अन्तर्राष्ट्रिय करिअरलाई ऐतिहासिक उपलब्धिसहित टुंग्याएका छन्।
प्रकाशित मिति: शुक्रबार, भदौ १९, २०८३
