भक्तपुर । नेपाली कांग्रेसको जारी १५औँ महाधिवेशनअन्तर्गत नेतृत्व चयनको प्रक्रिया तीव्र भइरहेका बेला भक्तपुर कांग्रेसका युवा नेता बद्रीराम थापा केन्द्रीय सदस्यको दौडमा उत्रिएका छन्।
थापाले बागमती प्रदेशबाट ३५ वर्षमुनिको युवा कोटामा केन्द्रीय सदस्य पदका लागि उम्मेदवारी दिएका हुन्।
उनको उम्मेदवारीलाई भक्तपुर क्षेत्र नम्बर २ को हालै सम्पन्न क्षेत्रीय अधिवेशनसँग जोडेर हेरिएको छ। उक्त अधिवेशनमा थापा प्यानलभन्दा बाहिरबाट उम्मेदवारी दिएर महाधिवेशन प्रतिनिधिमा निर्वाचित भएका थिए।
प्यानलबाहिरबाट जित्ने एक्ला नेता
भक्तपुर क्षेत्र नम्बर २ मा विशेष महाधिवेशन र नियमित महाधिवेशन पक्षधरबीच सहमति गरी संयुक्त प्यानल बनाइएको थियो। असोज ११ गतेदेखि मनोनयन प्रक्रिया सुरु भए पनि सर्वसम्मतिको प्रयास सफल नभएपछि निर्वाचन भएको थियो।
निर्वाचनमा संयुक्त प्यानलका अधिकांश उम्मेदवार विजयी भए। तर, प्यानलबाहिरबाट उम्मेदवारी दिएर महाधिवेशन प्रतिनिधिमा निर्वाचित हुने एक मात्र नेता थापा बने।
उल्लेख्य मतसहित निर्वाचित भएपछि थापाले आफ्नो व्यक्तिगत संगठनात्मक प्रभाव देखाएको उनका समर्थकहरूको दाबी छ। यही आधारमा उनी अहिले केन्द्रीय सदस्यको उम्मेदवार बनेका हुन्।
को हुन् बद्रीराम थापा?
बद्रीराम थापा प्रजातान्त्रिक आन्दोलनको विरासत बोकेको परिवारबाट राजनीतिमा आएका युवा नेता हुन्।
उनी प्रजातन्त्रका लागि सात वर्षभन्दा लामो समय जेलजीवन बिताएका प्रजातान्त्रिक सेनानी स्वर्गीय बलराम थापाका सुपुत्र हुन्। पिताको राजनीतिक संघर्ष र प्रेरणाबाट प्रभावित थापाले विद्यार्थी राजनीतिबाट आफ्नो राजनीतिक यात्रा सुरु गरेका थिए।
नेपाल विद्यार्थी संघ (नेविसंघ) भक्तपुरको सभापतिको जिम्मेवारी सम्हालिसकेका थापा विद्यार्थी राजनीतिबाट क्षेत्रीय राजनीतिमा स्थापित भएका हुन्।
भक्तपुर कांग्रेसमा उनलाई पुरानो राजनीतिक विरासत र नयाँ पुस्ताबीचको सेतुका रूपमा हेरिएको छ।
किन महत्त्वपूर्ण छ उम्मेदवारी?
कांग्रेसमा ३५ वर्षमुनिको युवा कोटाबाट केन्द्रीय सदस्यमा उम्मेदवारी दिनुलाई युवा पुस्ताको केन्द्रीय राजनीतिमा प्रवेशका रूपमा हेरिन्छ।
संगठनात्मक रूपमा बलियो मानिने भक्तपुरबाट प्यानलबाहिर उम्मेदवारी दिएर महाधिवेशन प्रतिनिधि निर्वाचित भएका थापाको केन्द्रीय सदस्यको उम्मेदवारीले कांग्रेसभित्र युवा पुस्ताको दाबीलाई थप मुखर बनाएको छ।
थापाले आफ्नो चुनावी पोस्टरमा कांग्रेसका सात जना शीर्ष नेतासहित पार्टीका संस्थापक नेता बीपी कोइरालाको तस्बिरसमेत राखेका छन्। यसमार्फत आफू कुनै एक गुट वा समूहको मात्र नभई समग्र कांग्रेसको साझा उम्मेदवार भएको सन्देश दिने प्रयास गरेको देखिन्छ।
प्रकाशित मिति: बिहीबार, असोज २२, २०८३
