काठमाडौं । नेपाली कांग्रेसको १५औँ महाधिवेशनमा विभिन्न सांसदहरूले उपसभापतिदेखि केन्द्रीय सदस्यसम्मका पदमा उम्मेदवारी दिएका छन् ।
संसदीय दलका नेता भीष्मराज आङ्देम्बेले उपसभापति पदमा उम्मेदवारी दिने घोषणा गरेका थिए । तर, उनले उम्मेदवारी दिएनन् ।
डा. चन्द्रमोहन यादवले उपसभापति (खुला) पदमा उम्मेदवारी दिएका छन् । समानुपातिकतर्फ निर्वाचित यादव पूर्वराष्ट्रपति रामवरण यादवका छोरा हुन् । राष्ट्रियसभा सदस्य रञ्जित कर्णले उपसभापति (मधेसी) पदमा उम्मेदवारी दिएका छन् ।
सहमहामन्त्री पदमा भरतबहादुर खड्का, योगेश गौचन थकाली, फिरदोस आलम र जनकराज गिरीले उम्मेदवारी दिएका छन् । डोटी–१ बाट निर्वाचित खड्का सार्वजनिक लेखा समितिका सभापति हुन् । मुस्ताङ–१ बाट निर्वाचित गौचनले अल्पसंख्यकतर्फ, रौतहट–२ बाट निर्वाचित आलमले मुस्लिमतर्फ तथा बाजुरा–१ बाट निर्वाचित गिरीले पिछडिएको क्षेत्रतर्फ सहमहामन्त्रीमा उम्मेदवारी दिएका छन् ।
कांग्रेसकी प्रमुख सचेतक वासना थापाले महिलातर्फ केन्द्रीय सदस्यमा उम्मेदवारी दिएकी छन् । उनी दैलेख–१ बाट निर्वाचित सांसद हुन् । प्रतिनिधिसभाकी सचेतक निश्कल राईले खुलातर्फ केन्द्रीय सदस्यमा उम्मेदवारी दिएका छन् । उनी इलाम–१ बाट निर्वाचित सांसद हुन् ।
खड्कबहादुर बुढाले खुलातर्फ केन्द्रीय सदस्यमा उम्मेदवारी दिएका छन् । उनी जाजरकोट–१ बाट निर्वाचित सांसद हुन् । प्रकाशसिंह कार्कीले पनि खुलातर्फ केन्द्रीय सदस्यमा उम्मेदवारी दिएका छन् । उनी सोलुखुम्बु–१ बाट निर्वाचित सांसद हुन् ।
मुगु–१ बाट निर्वाचित खड्गबहादुर शाहीले कर्णाली प्रदेश खुलातर्फ केन्द्रीय सदस्यमा उम्मेदवारी दिएका छन् । ताप्लेजुङकी समानुपातिक सांसद गीता कुमारी सेन्दाङले आदिवासी जनजाति महिलातर्फ उम्मेदवारी दिएकी छन् ।
पाँचथर–१ बाट निर्वाचित नरेन्द्रकुमार केरुङले खुलातर्फ केन्द्रीय सदस्यमा उम्मेदवारी दिएका छन् । बागलुङकी समानुपातिक सांसद रेनुका काउचाले जनजाति महिलातर्फ उम्मेदवारी दिएकी छन् ।
धादिङकी समानुपातिक सांसद सीता थपलियाले खुला महिलातर्फ केन्द्रीय सदस्यमा उम्मेदवारी दिएकी छन् । पाल्पा–१ बाट निर्वाचित सन्दीप रानाले खुलातर्फ केन्द्रीय सदस्यमा उम्मेदवारी दिएका छन् ।
कालीबहादुर सहकारीले पिछडिएको क्षेत्रतर्फ केन्द्रीय सदस्यमा उम्मेदवारी दिएका छन् । कालिकोटका सहकारीको उम्मेदवारी सो समूहमा परेको हो ।
भक्तपुरकी समानुपातिक सांसद गंगालक्ष्मी अवालले आदिवासी जनजातितर्फ केन्द्रीय सदस्यमा उम्मेदवारी दिएकी छन् ।
प्रकाशित मिति: बुधबार, असोज २१, २०८३
