काठमाडौं । बेनिनविरुद्ध ३–० को सहज जित निकाल्दै अर्जेन्टिनाले आफ्ना कप्तान लियोनल मेसीलाई सुखद बिदाइ दिएको छ ।
बुधबार ब्युनस आयर्सस्थित मास मोन्युमेन्टल रंगशालामा भएको खेलमा अर्जेन्टिनाका लागि निकोलस ओटामेन्डी, निको पाज र लियोनल मेसीले एक–एक गोल गरे ।
पहिलो हाफ गोलरहित बराबरीमा सकिएको खेलको ४८औँ मिनेटमा ओटामेन्डीले गोल गर्दै अर्जेन्टिनालाई अग्रता दिलाए । ६१औँ मिनेटमा पाजले गोल गर्दै टोलीको अग्रता दोब्बर बनाए ।
त्यसको १० मिनेटपछि मेसीले पेनाल्टीमार्फत गोल गर्दै अर्जेन्टिनालाई ३–० को अग्रता दिलाए । योसँगै अन्तर्राष्ट्रिय फुटबलमा मेसीको गोल संख्या १२६ पुगेको छ ।
मेसीले अन्तर्राष्ट्रिय फुटबलबाट सन्न्यास घोषणा गरेको एक महिनाभन्दा बढी भइसकेको छ । अर्जेन्टिना फुटबल संघले उनको सम्मानमा बिदाइ खेल आयोजना गरेको थियो ।
‘लास्ट ट्याङ्गो’ नाम दिइएको यो खेल मेसीको २०८औँ अन्तर्राष्ट्रिय खेल हो ।
बिदाइ खेलका लागि एडिडासले मेसीको ब्रान्ड लोगो अंकित विशेष जर्सीसमेत तयार पारेको थियो । खेल सकिएपछि म्याच रेफ्रीले मेसीलाई रातो र पहेँलो कार्ड हस्तान्तरण गर्दै विशेष सम्मान गरेका थिए ।
त्यस्तै, रंगशालाको स्क्रिनमा मेसीको खेल जीवन झल्काउने भिडियोसमेत प्रदर्शन गरिएको थियो ।
प्रकाशित मिति: बुधबार, असोज २१, २०८३
