काठमाडौं । आईसीसी क्रिकेट विश्वकप लिग–२ अन्तर्गत ओमान, क्यानडा र नेपाल सम्मिलित त्रिकोणात्मक एकदिवसीय शृङ्खलाका लागि नेपालको टोली घोषणा भएको छ ।
नेपाल क्रिकेट संघ (क्यान)ले शुक्रबार सन्दीप लामिछानेको कप्तानीमा १५ सदस्यीय टोली घोषणा गरेको हो ।
एसीसी प्रिमियर कपमा सहभागी टोलीमा केही परिवर्तन गरिएको छ । तीव्र गतिका बलर हेमन्त धामीको स्थानमा नन्दन यादवलाई टोलीमा समावेश गरिएको छ । यस्तै, स्पिनर शाहब आलम पनि टोलीमा परेका छन् । उनले हालसम्म एकदिवसीय अन्तर्राष्ट्रियमा डेब्यु गरेका छैनन् ।
ओपनर कुशल भुर्तेल र तीव्र गतिका बलर सोमपाल कामी भने यसपटक पनि एकदिवसीय टोलीमा परेनन् ।
ओमानमा अक्टोबर ९ देखि १९ सम्म सञ्चालन हुने शृङ्खलामा नेपालले अक्टोबर ११ र १७ मा क्यानडासँग तथा अक्टोबर १३ र १९ मा ओमानसँग खेल्नेछ ।
यो शृङ्खला विश्वकप लिग–२ मा नेपालको अन्तिम शृङ्खला हो । नेपाल हाल ३२ खेलबाट २४ अंक जोड्दै सातौँ स्थानमा छ ।
नेपाली टोली : सन्दीप लामिछाने (कप्तान), दीपेन्द्रसिंह ऐरी, रोहितकुमार पौडेल, आसिफ शेख, अर्जुन कुमाल, इशान पाण्डे, देव खनाल, सन्दीप जोरा, बसिर अहमद, गुल्शनकुमार झा, करण केसी, नन्दन यादव, ललितनारायण राजवंशी, शाहब आलम र शेर मल्ल ।
प्रकाशित मिति: शुक्रबार, असोज १६, २०८३
