काठमाडौं । नेपाल भलिबल लिग (एनभीएल)को फ्रेन्चाइज टोली मधेस वारियर्सले भारतका आउटसाइड हिटर रमन कुमारलाई अनुबन्ध गरेको छ ।
मधेसले कुमारलाई आफ्नो दोस्रो विदेशी खेलाडीका रूपमा टोलीमा भित्र्याएको हो । यसअघि टोलीले भारतकै सेटर मोहनउक्र पाण्डियनलाई अनुबन्ध गरिसकेको छ ।
कुमारले नेपालमा गण्डकी प्रदेश र मणिमुकुन्द भलिबल क्लबबाट विभिन्न प्रतियोगिता खेलिसकेका छन् । उनीसँग भारतीय लिगमा समेत खेलिसकेको अनुभव छ ।
मधेस वारियर्सको मुख्य प्रशिक्षकमा भरत यादव र सहायक प्रशिक्षकमा सुरज भुजेल छन् ।
मार्की खेलाडीका रूपमा रविन नगरकोटी रहेको मधेसले अक्सनबाट धनबहादुर भट्ट, सन्तोष मेहता, रामविनय यादव, राजन थापा, विप्सन शाही ठकुरी, रविन रसाइली र सञ्जुविक्रम शाहलाई अनुबन्ध गरेको थियो । टोलीले ‘ट्यालेन्ट हन्ट’बाट राज तिलकलाई पनि छनोट गरिसकेको छ ।
एनभीएलको पहिलो संस्करण शुक्रबार (भदौ १९)देखि त्रिपुरेश्वरस्थित राष्ट्रिय खेलकुद परिषद् (राखेप)को कभर्डहलमा सुरु हुँदैछ ।
मधेस वारियर्सले प्रतियोगिताको पहिलो खेलमा शुक्रबार नै सगरमाथा स्म्यासर्ससँग प्रतिस्पर्धा गर्नेछ ।
प्रकाशित मिति: बिहीबार, भदौ १८, २०८३
-1788432025.jpg)