काठमाडौं । नेपाल भलिबल लिग (एनभीएल) को फ्रेन्चाइज टोली काठमाडौंले पाकिस्तानका अदनान खान र अहमद मुस्ताफा खानलाई अनुबन्ध गरेको छ ।
काठमाडौंले एनभीएलको पहिलो संस्करणका लागि सेटर अदनान र आउटसाइड हिटर अहमदलाई टोलीमा भित्र्याएको हो । दुवै खेलाडी नेपाल आइसकेका छन् ।
अहमदले पाकिस्तानको सिनियर राष्ट्रिय टोलीबाट खेलिसकेका छन् भने अदनानले उमेर समूहमा पाकिस्तानको प्रतिनिधित्व गरेका छन् ।
अहमदले यसअघि नेपालमा पनि खेलिसकेका छन् । उनले नवौँ एनभीए कप महिला तथा पुरुष क्लब च्याम्पियनसिपमा रुकुम पश्चिमबाट सहभागिता जनाएका थिए । अदनानले हेल्प नेपाल स्पोर्ट्स क्लब र गण्डकी प्रदेशबाट विभिन्न नेपाली प्रतियोगिता खेलेका छन् ।
काठमाडौंको मुख्य प्रशिक्षकमा नृपबहादुर विक तथा सहायक प्रशिक्षकमा मोतिराम नेपाली रहेका छन् ।
मार्की खेलाडी सुनिल बोहरा रहेको काठमाडौंले अक्सनबाट सन्तोष राई, चिरञ्जीवी खड्का, सन्तोष विक, बलदेवसिंह धामी, जितबहादुर ढुंगेल, पुस्करसिंह धामी र दिपेश कुँवरलाई अनुबन्ध गरेको थियो । टोलीले ‘ट्यालेन्ट हन्ट’बाट दिलिप विकलाई पनि छनोट गरेको छ ।
एनभीएलको पहिलो संस्करण भदौ १९ गतेदेखि त्रिपुरेश्वरस्थित राष्ट्रिय खेलकुद परिषद् (राखेप) को कभर्डहलमा सुरु हुँदैछ ।
काठमाडौंले शनिबार मधेस वारियर्ससँग खेल्दै प्रतियोगिताको सुरुआत गर्नेछ।
प्रकाशित मिति: मंगलबार, भदौ १६, २०८३
