काठमाडौं । एसीसी प्रिमियर कपमा बहराइनले नेपालसामु ८८ रनको सामान्य लक्ष्य प्रस्तुत गरेको छ।
मलेसियाको यूकेएम यूएसडी ओभलमा टस हारेर पहिले ब्याटिङको निम्तो पाएको बहराइन ३६.२ ओभरमा ८७ रनमै अलआउट भयो।
बहराइनका फैज अहमदले १५, मोहम्मद वासिमले १३ तथा अली दाउदले १० रन बनाए। अन्य कुनै पनि ब्याटरले दोहोरो अंकमा रन बनाउन सकेनन्।
नेपालका कप्तान सन्दीप लामिछानेले उत्कृष्ट बलिङ गर्दै सर्वाधिक पाँच विकेट लिए। उनले १० ओभरमा चार मेडन राख्दै १४ रन खर्चिए।
त्यस्तै ललितनारायण राजवंशीले तीन तथा करण केसीले दुई विकेट लिए।
नेपाल क्रिकेट संघ (क्यान)ले गत महिना रोहितकुमार पौडेललाई कप्तानीबाट हटाउँदै सन्दीप लामिछानेलाई पुनः कप्तानीको जिम्मेवारी दिएको थियो। कप्तानमा फर्किएपछि सन्दीपको यो पहिलो आधिकारिक खेल हो।
प्रकाशित मिति: सोमबार, भदौ १५, २०८३
